ڕێگری لە بردنەدەرەوەی ئاژەڵی زیندوو بۆ پارێزگاکانی ناوەراست و باشوری عێراق دەکرێت

ئاڤا نیوز

لە نوێترین بڕیاری قایمقامیەتی سلێمانی بڕیاردرا بۆ پڕکردنەوەی پێداویستی بازار و خواستی هاووڵاتییان لە پارێزگای سلێمانی پشت بە مریشک و هێلکەی پرۆژەکانی ناوخۆ ببەسترێت، هاوردەکردنی سەوزەو میوەش بەپێی خواست و پێویستی بازار کراوە دەبێت.

چیرۆکی سەرەکی: بەمەبەستی دانانی هاوسەنگی بەروبوومی ئاژەڵی و پەلەوەری و بەرهەمەکانی سەوزە و میوە لە پارێزگای سلێمانی، بڕیاردرا لەسەر میکانیزمەکانی پاراستنی هاوسەنگی لە نێوان بەرهەم و بەرووبوومی ناوخۆیی و هاوردەکردنیان، بە جۆرێک کە خواستی هاووڵاتییان و پێداویستی بازار پربکاتەوە، هاوکات ڕێگری لە بەرزبوونەوەی نرخ بکرێت، و گرنگی زیاتریش بە بەرهەمی ناوخۆیی بدرێت.

ڕاگەیێنراوی فەرمی: قایمقامیەتی سلێمانی ڕایگەیاند، بڕیاردرا بە هەماهەنگی لایەنە پەیوەندیدارەکان لە پرکردنەوەی پێداویستی بازاردا پشت بە مریشک و هێلکەی پرۆژەکانی ناوخۆ ببەسترێت،  لەبەرئەوەی بەرهەمی پرۆژەکانی ناوخۆی مریشک و هێلکە لە وەرزی بەهاردا بە ڕێژەیەکی بەرز بەرهەم دەهێنرێت، هاوکات لە چوارچێوەی بڕیارو ڕێنماییەکانی حکومەتی هەرێمی کوردستان، رێگە بە هاوردەکردنی گۆشت و ئاژەڵی زیندوو، ماسی دەدرێت و هاوردەکردنییان لەمانگی سێ دا کراوە دەبێت.

زانیاریی زیاتر: لەبارەی بەرووبوومی ئاژەڵی بچووک لە ناوخۆدا، قایمقامی سلێمانی، لایەنە پەیوەندیدارەکانی ڕاسپاردووە کە رێگری لە بردنە دەرەوەی ئاژەڵی زیندوو بکرێت بۆ پارێزگاکانی ناوەراست و باشوری عیراق، لەبەرئەوەی لە ئێستادا خواستی هاووڵاتییان لە سەر بەکارهێنانی گۆشتی سوور زیادیکردووە ئەم قەدەغەکردنەش دەبێتە هەنگاوێک بۆ ڕێگریکردن لە بەرزبوونەوەی نرخی گۆشت لە بازاردا.