ڕووسیا داواکارییەکانی بۆ ڕازیبوون بە ئاگربەست ڕادەگەیێنێت

ئاڤا نیوز

دوای پێشنیازی ئەمریکا بۆ ئاگربەستی کاتی و ڕازیبوونی ئۆکراینا، تاوەکو ئێستا هەڵوێستی کۆتایی ڕووسیا ڕوون نییە و لیستێکی داواکاری پێشکەش بە واشنتن کردووە.

وێنە گەورەکە: لەسەر پێشنیازی ئەمریکا، ئۆکراینا ڕازی بووە بە ئاگربەستی 30  ڕۆژەی لەگەڵ ڕووسیا، تاوەکو ئێستا مۆسکۆ هەڵوێست و وەڵامی ڕوون ڕاناگەیەنێت، وتەبێژی کریملن وەڵامی ڕووسیا پەیوەست دەکات بە پەیوەندی تەلەفۆنی دۆناڵد ترەمپ و ڤلادیمێر پوتن و جێبەجێکردنی داواکارییەکانی ڕووسیا.

لێدوانی فەرمی: دیمیتری پیسکۆڤ، وتەبێژی کۆشکی کریملن ڕایگەیاند:" لە چەند ڕۆژی دهاتوودا پەیوەندییەکی تەلەفۆنی لە نێوان سەرۆک پوتن و دۆناڵد ترەمپ ئەنجام دەدرێت و بڕیار لەسەر ئاگربەستی کاتی دەدرێت."

ئەوەی پێویستە بیزانیت: لەسەرەتای دەستبەکاربوونی ترەمپ و دەستپێکردنی گفتوگۆکان ڕووسیا چەند داوکاریەکی پێشکەش کردووە وەک پێشمەرجی ڕاگرتنی جەنگ و لە ئێستادا ڕاگەیاندنەکانی ڕووسیا ئاماژە بەوە دەکەن ئەو داوکاریانە لە شێوەی لیستی مەرج و داوکاری ڕووسیا بۆ ڕازیبوون بە ئاگربەستی 30 ڕۆژە پێشکەش بە هاوپەیمانی ناتۆ و واشنتن کراوە و گرینگترینیان ئەم داواکاریانە لە خۆ دەگرێت:

٠ ڕەتکردنەوەی داوای ئۆکراینا بۆ ئەندامبوون لە هاوپەیمانی ناتۆ.

٠ دانپێدانانی نێودەوڵەتی بۆ دوورگەی کریما وەک بەشێک لە خاکی ڕووسیا.

٠ دانپێدانانی نێودەوڵەتی بۆ هەرێمەکانی لۆگانسک، دۆنێتسک، زاپارۆژیا، و خێرسۆن وەک بەشێک لە خاکی ڕووسیا.

٠ ڕاگرتنی فراوانبوونی هاوپەیمانی ناتۆ لە ڕۆژهەڵاتی سنورەکانی ڕووسیا.