پێشانگەیەكی شێوەكاریی بۆ وێنەكانی بارزانی نەمر دەكرێتەوە

ئاڤا نیوز

لە ساڵیادی لەدایكبوونی مەلا مستەفا بارزانی، لە هەولێر پێشانگەیەكی شێوەكاری تایبەت بە وێنەكانی دەكرێتەوە.

وێنە گەورەكە: ڕۆژی 14ـی ئادار، ساڵڕۆژی لەدایكبوونی بارزانی نەمرە كە 122 ساڵ لەمەوبەر لە 14-3-1903 لە گوندی بارزان هاتووەتە دونیاوە، ساڵانە لەم بۆنەیەدا هاونیشتمانیان بەچەندین چالاكی جۆراوجۆر ئەو یادە بەرز ڕادەگرن، هاوكات ژمارەیەكی زۆری هاونیشتمانییان سەردانی مەزاری نەمران دەكەن لە دەڤەری بارزان.

ڕاگەیێنراوی فەرمی: كۆمەڵەی هونەر و وێژەی كوردیی مەڵبەندی گشتیی هەولێر لە بانگهێشتنامەیەكدا كە بۆ ئاڤا میدیای ناردووە، تێیدا هاتووە كۆمەڵەكە بەهەماهەنگی پارێزگای هەولێر، لەم یادەدا پێشانگەیەكی شێوەكاری تایبەت بە وێنەكانی (بارزانی نەمر) بۆ هونەرمەندان: ڕاز دلێر، ڕۆژ دلێر و ڕەوەند دلێر، لە پاركی پێشمەرگەی شاری هەولێر دەكاتەوە و پێشانگەكە لە كاتژمێر 4ـی عەسرەوە كراوە دەبێت.

ئەوەی لەبارەیەوە دەوترێت: بەپێی لێكدانه‌وه‌ى مێژوونووسانى كورد و سه‌رچاوه‌ مێژووییه‌ ناوخۆیى و بیانییه‌كان، مسته‌فا بارزانى، جگە لەوەی بە ڕێبەری بزووتنەوەی ڕزگاریخوازی كورد دەناسرێتەوە، هاوكات یه‌كه‌م سه‌ركرده‌ى هه‌ڵكه‌وتووى كورد بووه‌، خه‌باتى كوردى له‌ بازنه‌ى ناوچه‌ییەوە‌ دەباتە ئاستی خه‌باتى نیشتمانى و له‌ داخوازى مافى سه‌ره‌تایى و مافى مرۆیى و كلتوورییه‌وه‌، داواكارییه‌كانى كوردى به‌رز كرده‌وه‌ بۆ ئاستى داواكارى سیاسى و به‌ دامه‌زراندنى پارتى دیموكراتى كوردستان له‌ ‌16ـی ئابى 1946، داخوازییه‌ نه‌ته‌وەییه‌كانى كوردى له‌ چوارچێوه‌ى به‌رنامه‌ى حیزبێكى سیاسى ڕێكخراودا، رێكخست.