ئەنەکەسە: دەستووری نوێی سووریا هەمووانی نائومێد کرد

ئاڤا نیوز

ئەنجومەنی نیشتمانی کورد لە سووریا (ئەنەکەسە) ڕایگەیاند، دەستووری نوێی سووریا ئێمەی تووشی سەرسوڕمان کردووە و هەموو پێکهاتەکانی سووریای نائۆمێد کردووە.

ڕاگەیێنراوی فەرمی: ئەنجومەنی نیشتمانی کورد لە سووریا ئەمڕۆ هەینی لەبارەی واژۆکردنی دەستووری کاتی سووریا لەلایەن ئەحمەد شەرع ڕاگەیێنراوێکی بڵاوکردەوە و ئەمانە لەخۆ دەگرێت:

٠ ئەم دەستوورە لەلایەن لیژنەیەکەوە ئامادەکرا کە نوێنەرایەتی پێکهاتە سیاسی و نەتەوەیی و ئاینییە جیاوازەکانی نەدەکرد.

٠ دەستووری نوێ، مافی ئاین و پێکهاتە جیاوازەکانی پشتگوێخستووە و ناسنامەی دەوڵەت تەنیا لە یەک نەتەوە پێکهاتووە.

٠ دەستووری نوێ سیستمی مەرکەزی بەهێز دەکات و دەسەڵاتی فراوان بە سەرۆک کۆمار دەبەخشێت، ئەمەش ترسی سەرهەڵدانەوەی پاوانخوازی زیاد دەکات.

٠ بڕگەکانی دەستوور ماف و ئازادییە تاکە کەسییەکان سنووردار دەکات.

٠ ئەم دەستوورە قەیرانەکە قوڵتر دەکاتەوە.

٠ دەستووری کاتی سووریا پێویستی بە پێداچوونەوە هەیە و تێیدا مافی هەمووان زامن بکات.

٠ ئەنەکەسە پابەندی خۆی بۆ چارەسەری دیموکراسی لە چوارچێوەی سووریایەکی لامەرکەزی دووپات دەکاتەوە.

لێدوانی فەرمی: نەواف ڕەشید، بەرپرسی كۆمیتەی ئەنجوومەنی نیشتمانیی كورد لە سووریا و لە هەرێمی كوردستان بە ئاڤا میدیای ڕاگەیاند، جگە لەو ڕاگەیێنراوە هیچ پەیامێکی دیکەمان بۆ دیمەشق نییە و لەگەڵ قسەدە و بەڕێوەبەرایەتی خۆسەر لەسەر ئەم بابەتە پەیوەندیمان نەبووە، بەڵام ئەوانیش وەک ئێمە لە دەستوورەکە ناڕازین.

نەواف ڕەشید دەڵێت: ئەحمەد شەرع بە واژۆکردنی دەستووری سووریا پاشەکشەی لە ڕێککەوتنەکەی لەگەڵ هەسەدە کردووە، بۆیە ڕێککەوتنەکەی نێوان مەزڵووم عەبدی و ئەحمەد شەرع سەرکەوتوو نابێت.

باکگراوند: ڕۆژی 13ـی ئادار کۆمیتەی پسپۆڕانی ڕاسپێردراو بۆ نووسینەوەی دەستووری سووریا ڕەشنووسی دەستووری نوێی سووریای ڕادەستی ئەحمەد شەرع کرد و ئەویش واژۆی لەسەر کرد، لە 53 ماددە پێکدێت، بەهۆی بێ بەشکردنی کورد و پێکهاتەکانی دیکە لە نووسینەوەی ئەو ڕەشنووسە لەلایەن بەشێکی زۆری پێکهاتە و هێزە سیاسییەکانی سووریا ڕەتکرایەوە.