تورکیا پێنج گومانلێکراوی دەستگیرکرد کە کاری سیخوڕییان بۆ ئێران کردووە

ئاڤا نیوز

هێزە ئەمنییەکانی تورکیا لە سێ پارێزگای وڵاتەکە پێنج کەسیان بە تۆمەتی سیخوڕیکردن بۆ ئێران دەستگیرکرد.

وێنە گەورەکە: پەیوەندییەکانی نێوان ئێران و تورکیا ماوەیەکە گرژی لێکەوتووەتەوە و پەرەسەندنەکانی ئەم دواییانەی سووریا بەتایبەتی ڕووخانی حکومەتەکەی بەشار ئەسەد و گۆڕانکاری لە هاوکێشەکانی دەسەڵاتدا، هەردوو وڵات وردتر لەسەر دەستکەوتنی زانیارییەکانی یەکتر کاردەکەن.

ڕاگەیێنراوی فەرمی: هیزە ئەمنییەکانی تورکیا ڕایانگەیاند: لە ئۆپەراسیۆنێکی هەماهەنگی لە سێ پارێزگای ئیستەنبوڵ و ئەنتالیا و مێرسین پێنج گومانلێکراومان بە تۆمەتی سیخوڕیی بۆ کۆماری ئیسلامی ئێران دەستگیرکرد کە سیانیان هاووڵاتی تورکیان و دووانەکەی دیکەش هاووڵاتی بیانین ئەو کەسانە پێشتر بە تۆمەتی سیخوڕی سەربازی و سیاسی داواکراو بوون.

زانیاری زیاتر: بەگوێرەی لێکۆڵینەوەکانی نووسینگەی داواکاری گشتی ئیستەنبوڵ و دەزگای هەواڵگریی نیشتمانی تورکیا، ئەو پێنج گومانلێکراوە پەیوەندییان لەگەڵ هێزە هەواڵگرییەکانی سوپای پاسداران هەبووە و دەستیان هەبووە لە کۆکردنەوە و گواستنەوەی زانیاری سەبارەت بە بنکە سەربازییەکان و خاڵە گرنگەکانی ناوخۆ و دەرەوەی تورکیا.