شەیبانی لەگەڵ هەر سێ سەرۆکایەتییەکەی عێراق کۆبووەوە

 

ئاڤا نیوز

لە یەکەم  سەردانی فەرمیی بۆ عێراق، ئەسعەد شەیبانی، وەزیری دەرەوەی سووریا دوای کۆبوونەوەی لەگەڵ هاوتا عێراقییەکەی لەگەڵ هەر سێ سەرۆکایەتییەکەی عێراق کۆبووەوە.

چیرۆکی سەرەکی: دوای نیوەڕۆی ڕۆژی هەینی، ئەسعەد شەیبانی، وەزیری دەرەوەی سووریا بە سەردانێکی فەرمی گەیشتە بەغدا و لەگەڵ فوئاد حوسێن، هاوتا عێراقییەکەی و سەرۆککۆمار  وسەرۆکوەزیران و سەرۆکی پەرلەمان کۆبووەوە.

ڕاگەیێنراوە فەرمییەکان: 

 

٠ مەحموود مەشهەدانی، سەرۆکی پەرلەمانی عێراق  جەختی لەسەر پێویستیی کاراکردنی پەیوەندییەکانی نێوان هەردوو وڵات و ڕێزگرتن لە دراوسێیەتی کردەوە و ڕایگەیاند، هیچ لایەک دەست لە کاروباری ناوخۆی هیچ وڵاتێکدا وەرنەدات.

پێویستە هاریکاریی ئەمنی نێوان عێراق و سووریا پتەو بکرێت بەمەبەستی کۆتایی هێنان بە ڕێکخراوی داعش و هەماهەنگی ئەمنی نێوان هەردوو وڵات زیاد بکرێت.

٠ بەگوێرەی نووسینگەی ڕاگەیاندنی محەممەد شیاع سوودانی، سەرۆکوەزیرانی عێراق، سوودانی ئامادەیی وڵاتەکەی بۆ بەشداریکردن لە ئاوەدانکردنەوەی سووریا دەربڕی، هاوکات جەختی لەسەر گرنگیی هەماهەنگی بۆ ڕووبەڕووبوونەوەی مەترسییەکانی تیرۆر کردەوە لەپێناو گەیشتن بە سەقامگیری کە پێشمەرجی ئاوەدانکردنەوەی سووریایە.

لە لایەکی دیکەوە: ئەسعەد شەیبانی، وەزیری دەرەوەی سووریا لە کۆنگرەیەکی هاوبەشی ڕۆژنامەوانی لەگەڵ هاوتا عێراقییەکەی دووپاتی کردەوە، سەردانەکەیان بۆ بەغدا بە ئامانجی بەرزکردنەوەی ئاڵوگۆڕی بازرگانی و لابردنی بەربەستەکانی نێوان هەردوو وڵات بووە، دووپاتیشی کردەوە کە ئامادەن هاوکاریی عێراق بین لە ڕووبەڕووبوونەوەی داعش.