فازڵ میرانی: دەسەڵاتدارانی بەغدا کوردیان وەک هاوبەش قبووڵ نەکردووە

ئاڤا نیوز

فازڵ میرانی پێی وایە، کێشەی کورد له‌ به‌غدا پۆست و دەستکەوت نییە، کورد خەون بەوە دەبینێت بەغدا هاوبەشی ڕاستەقینەی بێت، بەڵام بەرپرسانی بەغدا ڕێگربوونە لەو هاوبەشییە.

چیرۆکی سەرەکی: به‌رپرسی ده‌سته‌ی كارگێڕیی مەکتەبی سیاسیی پارتی دیموکراتی کوردستان بەشداریی لە بەرنامەی "بالثلاثة"ـی کەناڵی "ئەلشەرقییە" کرد، کە ڕۆژی شەممە تەواوی بەرنامەکە پەخش دەکرێت، ئاماژەی بە پەیوەندییەکانی نێوان هەردوو حکومەتی هەرێمی کوردستان و عێراق  و سیاسەتەکانی بەغدا بەرامبەر هەولێر کرد.

لێدوانی فەرمی: فازڵ میرانی، به‌رپرسی ده‌سته‌ی كارگێڕیی مەکتەبی سیاسیی پارتی دیموکراتی کوردستان لە چاوپێکەوتنێکی تەلەڤزیۆنیدا لەگەڵ کەناڵی "ئەلشەرقییە" ڕایگەیاند:

٠ کێشەی کورد، کێشەی پۆست و دەستکەوت نییە، بەڵکو کێشەی مەعنەوییە، هێشتا خەون بەوەوە دەبینین کە هاوبەشی ڕاستەقینە و وەک برابین.

٠ کورد هێشتا خەون بەوەوە دەبینێت، بەغدا هاوبەشی ڕاستەقینەی بێت.

٠ لە دوای 2003ـەوە سەرجەم حکوومەتەکانی عێراق بەرپرسیاربوون لەوەی کورد وەک هاوبەشی سەرەکی بەشداری حکومڕانیی نەکردووە، ئێمە کێشەمان لەگەڵ گەلی عێراق نییە، بەڵکو دەسەڵاتدارانی بەغدا کوردیان وەک هاوبەش قبووڵ نەکردووە.

٠ کورد لە سیاسەت و مامەڵەکانی دەسەڵاتدارانی بەغدا دوودڵ و نیگەرانە.

٠ ئەوەی هەیە مافه‌كانی كورد له‌چوارچێوه‌ی ده‌ستوور و بڕیاره‌كانی دادگای باڵای فیدڕاڵی مامه‌ڵه‌ی له‌گه‌ڵدا ناكرێت، بەڵکو ئەو مافانەی کورد پێشێلکراوە.