وەزارەتی دەرەوەی تورکیا بۆ ئاڤا: چاودێری ڕێککەوتنی نێوان هەسەدە و سووریا دەکەین

ئاڤا نیوز

وەزارەتی دەرەوەی تورکیا لە ڕێگەی ئاڤا میدیاوە هەڵوێستی خۆی لەسەر ڕێککەوتنەکەی ئیدارەی نوێی سووریا و هەسەدە ڕادەگەیێنێت، جەخت لەوە دەکاتەوە کە ئەوان بە وردی چاودێری جێبەجێکردنی سەرجەم خاڵەکانی ڕێککەوتنەکە دەکەن.

وێنە گەورەکە: لە دوای ڕووخانی دەسەڵاتی بەشار ئەسەد، یەکخستنەوەی هێزە چەکدارەکانی سووریا ئامانجی سەرەکی ئیدارەکەی ئەحمەد شەرع، سەرۆککۆماری نوێی سووریا بۆ قۆناغی ڕاگوزەر بوو، تا لە کۆتاییدا لە 2025-03-10، ڕێککەوتنێکی هەشت خاڵی لە نێوان مەزڵووم عەبدی و شەرع واژۆکرا کە هێزەکانی هەسەدە دەخاتە نێو هێزی بەرگری سووریا.

ڕاگەیێنراوی فەرمی: وەزارەتی دەرەوەی تورکیا لە ڕێگەی ئیمێڵەوە سەبارەت بە ڕێککەوتنەکەی نێوان ئیدارەی نوێی سووریا و هەسەدە بە ئاڤا میدیای ڕاگەیاند، ئەو ڕێککەوتنەی بەم دواییانە لە نێوان ئیدارەی نوێی سووریا و هەسەدە کراوە بە وردی و بێ کەموکوڕی چاودێری جێبەجێکردنی خاڵەکانی دەکەین.

-    چاوەڕێ دەکەین ئەم ڕێککەوتنە خزمەت بە یەکپارچەیی خاکی سووریا بکات، بەجۆرێک یەک ئیدارە سووریا بەڕێوە ببات و ڕێگە بە دروست بوونی گرووپی چەکداری لە ناوچەکە نەدرێت. 

لەلایەکی دیکەوە: وەزارەتی دەرەوەی تورکیا ئاماژەی بەوەشداوە، تورکیا ئامانجی پاککردنەوەی سووریایە لە هەموو جۆرە تیرۆر و تیرۆریستان، هاوکات دڵنیابوون لەوەی کە مەترسی لەسەر هیچ وڵاتێکی دراوسێ دروستنەکات بە تورکیاشەوە.

-    تاوەکو ئێستا هیچ گۆڕانکارییەک لە ئیرادەی تورکیادا بۆ بەرەنگاربوونەوەی تیرۆر نییە بە هەمان سیاسەتی پێشوو بەردەوام دەبین.