فایلی خەڵک؛ بەدواداچوون بۆ کێشەی خانووەکانی کەسوکاری شەهیدانی هەڵەبجە دەکرێت

ئاڤا نیوز

کەسووکاری شەهیدانی کیمیابارانی هەڵەبجە بەتایبەت ئەوانەی سوودمەند نەبوون لەوەرگرتنی زەوی، داوای تەواوکردنی پڕۆژەی دابینکردنی زەوی و پێشینە دەکەن بۆ تەواوکردنی خانووەکانیان.

ئەوەی پێویستە بیزانیت: پڕۆژەیەک بۆ دروستکردنی 407 خانوو بۆ کەسوکاری کیمیابارانی هەڵەبجە هەبوو کە لە ساڵی 2014ەوە بە هۆی قەیرانی داراییەوە ڕاگیراوە کە بە پێی پڕۆژەکە، بڕیار وابوو هەر کەسێک 23 هەزار دۆلاری پێ بدرێت بۆ دروستکردنی خانووەکەی، ئەویش بە سێ پێشینە:

- پێشینەی یەکەم پێنج هەزار دۆلار

- پێشینەی دووەم 10 هەزار دۆلار

- پێشینەی سێیەمیش هەشت هەزار دۆلار

ئەمەش بزانە: سەرەتا 31 کەس پێشینەی یەکەمی وەرگرت. دواتر 263 کەسی دیکەش چەکی پێشینەی یەکەم و دووەمیان وەرگرت.  هاوکات دواجار 113 کەسی دیکە هەر سێ پێشینەکەیان وەرگرتووە.

لێدوانی فەرمی: لوقمان عەبدولقادر، سەرۆکی کۆمەڵەی قوربانیانی هەڵەبجە بە ئاڤا میدیای ڕاگەیاند، لە کاتی سەردانی سەرۆکوەزیران مەسرور بارزانی بۆ پارێزگای هەڵەبجە، یادداشتێکیان دایە سەرۆکوەزیران، ئەویش ڕەزامەندی لەسەردا کە پڕۆژەکە لەسەر بودجەی پارێزگای هەڵەبجە تەواو بکرێت.

لەلایەکی دیکەوە: پارێزگای هەڵەبجە دەڵێت، پارەکە زۆرە و ئێمەش بودجەی پێویستمان نییە بۆیە داوامان لە ئەنجوومەنی وەزیران کردووە پارەی پڕۆژەکە بخرێتە سەر وەزارەتی شەهیدان، کە تا ئێستا نەکراوە.

زانیاریی پەیامنێر: ئاراس ڕەفیق، پەیامنێری ئاڤامیدیا لە هەڵەبجە پەیوەندی بە ئەحمەد مام ڕەسوڵ، بەڕێوەبەری گشتیی خزمەتگوزاریی وەزارەتی شەهیدان کردووە،ئەویان وتی، گوتی دەرخستەیان بۆ ئەنجوومەنی وەزیران کردووە تا پارەی پڕۆژەکە بخرێتەوە سەر وەزارەتەکەیان، بەڵام تا ئێستا وەڵامیان نەدراوەتەوە.