کۆبوونەوەی لووتکە؛ مەسرور بارزانی و بافڵ تاڵەبانی بڕیار لەسەر کابینەی 10 دەدەن

ئاڤا نیوز

مەسرور بارزانی، سەرۆکوەزیرانی کوردستان و بافڵ تاڵەبانی، سەرۆکی یەکێتیی نیشتمانیی کوردستان جارێکی دیکە لەبارەی پێکهێنانی کابینەی 10ـی حکومەت و چەند پرسێکی دیکە کۆدەبنەوە.

وێنە گەورەکە: کارەکانی پێکهێنانی حکومەت زۆر باش چوونەتە پێشەوە، بەپێی زانیارییەکان لیژنە تەکنیکییەکان زۆربەی کارەکانیان تەواو کردوون لەبارەی کارنامەی کابینەی نوێی حکومەت و دابەشکردنی دەسەڵاتەکان، ئەوەی ماوەتەوە دابەشکردنی پۆستەکانە.

لێدوانی فەرمی: پێشەوا هەورامانی، وتەبێژی حکومەتی هەرێمی کوردستان دەڵێت: کۆبونەوەکە بۆ تاوتوێی پێکهێنانی کابینەی نوێ و دۆخی سیاسی هەرێمی کوردستانە، باس لە خۆئامادەکردنە بۆ گۆڕانکاری و پێشهاتەکان و مامەڵەی هەرێمی کوردستان لەگەڵیاندا".

 

ئەوەی پێویستە بیزانیت: ئەمە دەبێتە دووەم کۆبوونەوەی لووتکە دوای هەڵبژاردنی خولی شەشەمی پەرلەمانی کوردستان لە مانگی 10ـی ساڵی ڕابردوودا، چونکە لە پارتی مەسرور بارزانی سەرۆکایەتی کابینەی 10 دەکات، لە یەکێتیش بافڵ تاڵەبانی قسە و بڕیاری کۆتایی لای خۆیەتی، بۆیە گفتوگۆی ڕاشکاوانە دەکەن و ئەم پرسانەی کە ماون بڕیاری لەسەر دەدەن. کۆبوونەوەی یەکەمیان 15ـی یەکی ئەمساڵ بوو لە هەولێر.

بۆچی گرنگە:  چاوەڕوان دەکرێت ئەم کۆبوونەوەیە هۆکارێکی کاریگەر بێت بۆ خێرا پێکهێنانی حکومەت. پێکهێنانی حکومەت کاریگەرییەکی زۆری لەسەر دەروونی خەڵک و زۆربەی بوارەکان دەبێت بەتایبەت بووژانەوەی بازاڕ. هاوکات حکومەتێکی بەهێز و یەکدەنگی کورد دەبێتە هۆی زامنکردنی مافەکانی خەڵکی کوردستان لە بەغدا بەتایبەت مووچە و شایستە داراییەکان.