مەسرور بارزانی: بە ئەرکی دەزانین خزمەتێکی شایستەی هەڵەبجە بکەین

ئاڤا نیوز

 

سەرۆکوەزیران مەسرور بارزانی لە یادی کیمیابارانکردنی هەڵەبجە پەیامێکی بڵاوکردەوە و ڕایدەگەیێنێت: حکومەتی هەرێمی کوردستان بە ئەرکی سەرەکیی خۆی دەزانێت، خزمەتێکی شایستەی هەڵەبجەییەکان و قوربانییانی دیکەی جینۆسایدی گەلی کوردستان بکات.

 

چیرۆکی سەرەکی: ڕۆژی یەکشەممە 16ـی ئاداری 2025، سەرۆکوەزیران مەسرور بارزانی لە سی و حەوتەمین ساڵیادی کیمیابارانی هەڵەبجە پەیامێکی بڵاوکردەوە.

 

پەیامی فەرمی: لە پەیامەکەی سەرۆکوەزیران مەسرور بارزانی هاتووە: لە ساڵوەگەڕی کیمیابارانکردنی شاری هەڵەبجە و دەوروبەری، ئەمڕۆ بە ڕێز و شکۆوە یادی شەهیدانی ئەم کۆمەڵکوژییەی ڕژێمی پێشووی عێراق دەکەینەوە و هەمیشە لە یادمانن.

 

-پێزانینی زۆرمان بۆ قوربانیدانەکانی خەڵکی نیشتمانپەروەر و تێکۆشەری هەڵەبجە، بە تایبەتی بریندارانی کارەساتەکە و کەسوکاری سەربەزری شەهیدان هەیە.

-هەرچەندە بەشێک لە بەرپرسیار و ئەنجامدەرانی سەرەکیی ئەم تاوانە، بە سزای خۆیان گەیشتن، بەڵام سەرەڕای تیپەڕبوونی 37 ساڵ بەسەر ئەم کارەساتە مەزنە، هێشتا زام و برینەکانی ئەم تاوانە ساڕێژ نەبوون.

- ئەرکی هەموومانە، کار لەپێناو زیاتر ناساندنی جینۆسایدی هەڵەبجە و ئەنفال و هەموو تاوانەکانی دی، کە بەرانبەر گەلی کوردستان کران، بکەین و خزمەتێکی زیاتری بنەماڵە و کەسوکاری شەهیدان و قوربانییانی ئەم تاوانانە بکەین.

-حکومەتی هەرێمی کوردستان، بە ئەرکی سەرەکیی خۆی دەزانێت کە خزمەتێکی شایستەی هەڵەبجەییەکان و قوربانییانی دیکەی جینۆسایدی گەلی کوردستان بکات.

-لە ساڵانی ڕابردووشدا، چەندین پرۆژەی خزمەتگوزاری لەبوارە جۆراوجۆرەکاندا لە پارێزگای هەڵەبجە ئەنجامداوە، بەڵام دەشزانین هەڵەبجە پێویستی بە خزمەتی زیاتر هەیە، لەم ڕووەوە، دانیشتووانی بەڕێز و قوربانیدەری پارێزگەی هەڵەبجە دڵنیا دەکەینەوە کە لە داهاتووشدا زیاتر و باشتر خزمەتی ئەو ناوچەیە دەکەین.

-ئەوەی جێی داخە، حکومەتی فیدراڵ تائێستا، بەرپرسیاریێتیی دەستووری و یاسایی خۆی لە قەرەبووکردنەوەی بنەماڵە و کەسوکاری قوربانییان، شەهیدانی هەڵەبجە و ئەنفالکراوان جێبەجێ نەکردووە.

 
-تەنانەت تائێستاش، ئەنجوومەنی نوێنەران پرۆسەی بەپارێزگابوونی هەڵەبجەی پەسەند نەکردووە.

- داوا دەکەین چیتر کەمتەرخەمی بەرانبەر قوربانیدانەکانی هەڵەبجە نەکرێت و بەشێوەیەکی شایستە، قەرەبووبکرێنەوە و بەپارێزگابوونەکەشی لە زووترین کاتدا پەسەند بکرێت.

-سڵاو لە گیانی پاکی شەهیدانی هەڵەبجە و گشت شەهیدانی کوردستان.

 

باکگراوند: لە کۆتاییەکانی جەنگی هەشت ساڵەی نێوان عێراق – ئێران، لە 16/3/1988 هەڵەبجە كەوتە بەر شاڵاوی کیمیابارانکردنی ڕژێمی بەعس، کە بووە هۆی شەهیدبوونی زیاتر لە پێنج هەزار کەس و برینداربوونی زیاتر لە 10 هەزار کەسی دیکە و ئاوارەبوونی تەواوی خەڵکی شارەکە.