نێچیرڤان بارزانی: کارەساتی هەڵەبجە به‌ ته‌نیا به‌س بوو بۆ داننان به‌ هه‌موو مافه‌ ڕه‌واكانی گه‌لی كوردستان

ئاڤا نیوز

 

نێچیرڤان بارزانی، سەرۆکی هەرێمی کوردستان له‌ ساڵیادی 37ـین كاره‌ساتی كیمیابارانكردنی هه‌ڵه‌بجه‌ پەیامێکی هاوخەمی بڵاوکردوە.

 

پەیامی فەرمی: نێچیرڤان بارزانی، سەرۆکی هەرێمی کوردستان ڕایەگەیاند، هه‌ڵه‌بجه‌ بووه‌ هێمایه‌كی جیهانی بۆ سته‌ملێكراوی گه‌له‌كه‌مان‌ و شایه‌تحاڵێك بۆ دڕنده‌یي ئه‌و تاوانانه‌ی دژی ئه‌نجام دران.

زانیاریی زیاتر: سەرۆکی هەرێمی کوردستان لە پەیامەکەیدا دەشڵێت:

 

- ئه‌گه‌ر دادپه‌روه‌رييه‌كی ڕاسته‌قینه‌ هه‌بووایه‌، ئه‌م كاره‌ساته‌ به‌ ته‌نیا به‌س بوو بۆ داننان به‌ هه‌موو مافه‌ ڕه‌واكانی گه‌لی كوردستان.

-  جارێكی دیكه‌ جه‌خت ده‌كه‌ينه‌وه‌ كه‌ پێویسته‌ قه‌ره‌بوو‌ی خه‌ڵكی هه‌ڵه‌بجه‌ و هه‌موو قوربانيیانی جینۆساید و ئه‌نفال بكرێته‌وه‌ و له‌ هه‌موو بواره‌كاندا باشترین خزمه‌تگوزاریيان پێشكه‌ش بكرێت‌.

 
- ئه‌ركی حكومه‌تی عێراقه‌ به‌رپرسیاريه‌تيی یاسایی و ئه‌خلاقيی خۆی به‌رانبه‌ر قوربانیيان و هه‌موو پابه‌ندییه‌كانی دەرهەق بە هه‌ڵه‌بجه‌ و دانیشتوانه‌كه‌ی جێبه‌جێ بكات و دادپه‌روه‌رييان بۆ به‌دی بهێنێت.

-   پێویستە حکومەتی عێراق هه‌موو ڕێكاره‌كانى به‌پارێزگابوونى هه‌ڵه‌بجه‌ ته‌واو بكات.

- پێويسته‌ كۆمه‌ڵگەی نێوده‌وڵه‌تییش‌ له‌ هه‌وڵه‌كانی بۆ دڵنیابوون له‌ دووباره‌نه‌بوونه‌وه‌ی ئه‌م جۆره‌ تاوانانه‌ له‌ هه‌ر شوێنێكی جیهان به‌رده‌وام بێت.

 

باکگراوند: لە کۆتاییەکانی جەنگی هەشت ساڵەی نێوان عێراق – ئێران، لە 16/3/1988 هەڵەبجە كەوتە بەر شاڵاوی کیمیابارانکردنی ڕژێمی بەعس، کە بووە هۆی شەهیدبوونی زیاتر لە پێنج هەزار کەس و برینداربوونی زیاتر لە 10 هەزار کەسی دیکە و ئاوارەبوونی تەواوی خەڵکی شارەکە.