عەمار حەکیم: بوونی بە پارێزگایەکی نوێی عێراق باشترین ڕێزلێنانە بۆ هەڵەبجە

ئاڤا نیوز

 

سەرۆکی ڕەوتی حیکمەی نیشتمانیی عێراق دەڵێت، ئەوەی بەسەر هەڵەبجە هات برینێکی قوڵە و ئەو شارە وەک سمبوولێکی گرنگی عێراق دەمێنێتەوە، جەختیش دەکاتەوە کە بوونی بە پارێزگایەکی نوێی عێراق باشترین ڕێزلێنانە بۆ هەڵەبجە.

 

وێنە گەورەکە: عەممار حەکیم، سەرۆکی ڕەوتی حیکمەی نیشتمانیی عێراق، بەبۆنەی 37ـین ساڵیادی کیمیابارانی شاری هەڵەبجە لەلایەن ڕژێمی پێشووی عێراقەوە پەیامێکی بڵاوکردوە.

 

بڵاوکراوەی فەرمی: عەممار حەکیم، سەرۆکی ڕەوتی حیکمەی نیشتمانیی عێراق ڕایگەیاند، "هەڵەبجەی شەهید وەک برینێکی قوڵ لە دڵی ئێمە و هەموو خاوەن ویژدانەکانی جیهان دەمێنێتەوە. هەڵەبجە سمبوولێکی گرنگی عێراقییەکانە، باشترین ڕێزگرتنیش بۆی، کردنییەتی بە پارێزگایەکی نوێ لە عێراق".

 

زانیاریی زیاتر:  لەبارەی بە پارێزگابوونی هەڵەبجەش، حەکیم گوتی،"ئەم هەنگاوە دەرفەتی کار و بوژانەوەی ئابووری لە هەڵەبجە زیاتر دەکات، نوێنەرایەتییەکی سیاسی فراوانتریش لە بڕیاری عێراقیدا بە هەڵەبجە دەبەخشێت".

 

باکگراوند: ئەمڕۆ 37 ساڵ بەسەر کیمیابارانکردنی شاری هەڵەبجە لەلایەن ڕژێمی بەعسی لەناوچووی عێراق تێپەڕدەبێت، کە بەوهۆیەوە زیاتر لە پێنج ھەزار ھاووڵاتیی مەدەنی شەھید و زیاتر لە 10 هەزار ھاووڵاتیی دیکەیش برینداربوون، تەواوی خەڵكی شارەکەش ئاوارەبوون.