ئومێد خۆشناو: دەمانەوێت بەر لە جەژن بازاڕی قەیسەری بکەینەوە

ئاڤا نیوز

 

نۆژەنكردنەوەی بازاڕی قەیسەریی هەولێر گەیشتووەتە قۆناغی كۆتایی و هەوڵدەدرێت بەر لە جەژن بازاڕەکە بەڕووی هاووڵاتیاندا بکرێتەوە.

 

وێنە گەورەکە: بازاڕی قەیسەریی هەولێر، لەلایەن باندێكی سەر بە پەكەكەوە سووتێنران و بەهۆیەوە سەدان دووکان سووتان و خاوەنەکانیان بە سەدان هەزار دۆلار زیانیان بەرکەوت، دواتر بە بڕیاری سەرۆکوەزیران مەسرور بارزانی بڕی پێنج ملیار و 300 ملیۆن دینار بۆ نۆژه‌نكردنه‌وه‌ی تەرخان کرا.

 

لێدوانی فەرمی: ئومێد خۆشناو، پارێزگاری هەولێر ڕایگەیاند: لە کۆتا ڕۆژەکانی نۆژەنکردنەوەی بازاڕی قەیسەری نزیکبوونەینەتەوە و دەمانەوێت بەر لە جەژن تەواوی دووکانەکان ڕادەستی خاوەنەکانیان بکرێتەوە و دەست بە کارەکانیان بکەنەوە.

 

ئەوەی پێویستە بیزانیت: ئومێد خۆشناو دەشڵێت:

-کاسبکارانی بازاڕەکە، لە باجی 50٪ی ساڵێک و 100٪ـی ساڵێکی دیکە بەخشران.
-خاوەن دووکانەکان لێخۆشبوونیان لە پارەی خاشاک بۆ کراوە.
-هاوکاریی سەرۆکوەزیران مەسرور بارزانی بۆ کاسبکارانی بازاڕەکە دابەشکراوە و کەمترین هاوکاری دوو ملیۆن و زۆرترین هاوکاری زیاتر لە 20 ملیۆن دینار بووە.

 

ئەمەش بزانە: دوای نۆژەنکردنەوەی بازاڕەکە، بەشی سەرەوەی کە 50 دووکان لەخۆی دەگرێت و پێشتر داخرابوو، بەڕووی هاووڵاتیاندا دەکرێتەوە، هاوکات پێشنیازکراوە میوانخانەیەکی تایبەت بە حکومەت لە بازاڕەکە بکرێتەوە و لەوێ پێشوازی لە شاند و نێردەی دیپلۆماسی وڵاتان بکرێت.