بریکارەکانی دابەشکردنی بەشەخۆراک ئاگادار دەکرێنەوە

ئاڤا نیوز

 

ئاگاداریی بریکارەکانی دابەشکردنی خۆراک دەکرێتەوە سەردانی بەڕێوەبەرایەتی دابەشکردنی خۆراکی سلێمانی بکەن بۆ وەرگرتنەوەی پێناسەکانیان.

 

لێدوانی فەرمی: کامەران فەتاح، بەڕێوەبەری کەلوپەلی خۆراکی سلێمانی بە ئاڤا میدیای ڕاگەیاند، پێشتر ساڵانە نوێکردنەوەی پێناسی بریکارەکان لە هەرێمی کوردستان دەکرا و داهاتەکەشی بۆ خەزێنەی حکومەت بوو، بەڵام ئەمساڵ بە بڕیار گواسترایەوە بۆ عێراق و لە بەغدا پێناسەکان نوێدەکرێنەوە، پارەکەشی بە کاش وەرناگیرێت و داهاتەکەی بۆ بەغدا دەڕوات.

 

زانیاریی زیاتر: "سەرەتا بۆ ئەوەی قەرەباڵغی دروست نەبێت تەنیا ئاگاداری بریکارەکانی بنکەی 261 و 262 بەڕێوەبەرایەتیمان کراوەتەوە بۆ وەرگرتنەوەی پێناسەی بریکارەکانیان، کە لە بەغداد بۆیان دەرکراوە". کامەران فەتاح وادەڵێت.

ئەوەی پێویستە بیزانیت: نزیکەی هەزار و 800 پێناس دەرچووە، بەڵام بە نۆرە دابەش دەکرێن، تێچووی دەرکردنی پێناسەکە 16 هەزار دینارە و دەبێت لەگەڵ بریکارەکان پێناسە کۆنەکەش بهێننەوە.

 

ئەمەش بزانە: هاوکات پارەی کاش وەرناگیرێت، دەبێت بریکارەکان بە کارتی بانکی پارە بدەن، یان کارتی بانکی کەسێکی دیکە بێت.