جووتیارێکی کورد لەسەر سکاڵای سەربازێکی عێراقی دەچێتە دادگە

ئاڤا نیوز

محەممەد ئەمین، نوێنەری جووتیارانی کورد لە سنووری سەرگەڕانی کەرکووک لەسەر سکاڵای سەربازێکی سوپای عێراق دەچێتە بەردەم دادوەر.

وێنە گەورەکە: ڕۆژی دووشەممە 2025-02-17، جووتیارانی گوندی شەناغە لە سنووری سەرگەڕان، خەریکی کێڵانی زەوییەکانیان بوون، بەڵام هێزێکی زۆری سوپای عێراق هەڵیکوتایە سەر جووتیاران و کارەکانیانی پێ ڕاگرتن، دواتر سەربازێکی عێراقی پەلاماری جووتیارێکی کوردی دا و بە ملپێچەکەی ڕایکێشا، دواتر لە دادگە سکاڵای لەسەر جووتیارەکە تۆمار کرد.

ئەوەی پێویستە بیزانیت: ئەمرۆ دووشەممە 17-3-2025، محەممەد ئەمین، نوێنەری جووتیارانی کورد لە کەرکووک، لەسەر سکاڵاکە چووەتە دادگەی دوبز، تاوەکو ئیفادەی خۆی بدات.


-سکاڵاکەی سەر محەممەد ئەمین، بەپێی مادەی 229یە لە یاسایی سزادانی عێراقی، ماددەکە باس لە هێرشکردنە سەر کارمەندانی دەوڵەت دەکات لە کاتی ئەرکدا.

لێدوانی فەرمی: پێشتر محەممەد ئەمین، نوێنەری جووتیارانی کورد لە گوندی شەناغە بە ئاڤا میدیای راگەیاند: بۆ پێشکەشکردنی بەڵگە و شایەتحاڵەکان لەسەر پەلاماردانی سەربازە عێراقییەکە، سەردانی دادگەی کردووە، بەڵام لەوێ شۆک بووین کە زانیویەتی سەربازە عێراقییەکە چووەتە بەردەم دادوەر و سکاڵای لەسەری تۆمار کردووە.
 
لەلایەکی دیکەوە: یوسف شوانی، پارێزەری کەیسەکەی محەممەد ئەمین، بە ئاڤا میدیای گوت: بە تۆمەتی لێدان و هێرشکردنە سەر سەربازەکە سکاڵا لەسەر جووتیارە کوردەکە تۆمار کراوە.
 
زانیاریی زیاتر: پارێزەرەکە ئەوەی بۆ ئاڤا میدیا ئاشکرا کرد، "ئەو ڤیدیۆ و وێنانەی ئاڤا میدیای لەکاتی هێرشەکەی سوپای عێراق بۆ سەر جووتیارانی کورد تۆماری کردووە، خراونەتە بەر دەستی دادوەر".

ئەمەش بزانە: دیارترین ئەو بەڵگانەی ئاڤا میدیا کە جووتیارە کوردەکە لە دادگە پشتی پێ بەستووە، ساتی شکاندنی سوویچی تراکتۆری جووتیارێکە لەلایەن سەربازێکی سوپای عێراقەوە.