عێراق لە هاوردەکردنی غازی ئێران بۆ وێستگەکانی کارەبا بەردەوامە

ئاڤا نیوز

هەفتەیەک بەسەر ڕاگرتنی مۆڵەتی ئەمریکا بۆ عێراق بۆ کڕینی غازی ئێران کۆتایی هاتووە بەڵام هێشتا عێراق پابەند نەبووە و لە هاردەکردنی غازی ئێرانی بۆ وێستگەکانی کارەبا بەردەوامە.

وێنە گەورەکە: لەچوارچێوەی سیاسەتی نوێی ئەمریکا و فشارەکانی ئیدارەی دۆناڵد ترەمپ بۆسەر ئێران، مۆڵەتی عێراقی بۆ کڕینی غازی ئێرانی هەڵوەشاندەوە و 8-3-2025 دوایین وادەبوو بۆ عێراق و دەبێت ئەو مامەڵەیە ڕابگیرێت، بەڵام بە گووتەی بەڕێوەبەری بەرهەمهێنانی کارەبای باشوور هێشتا هاوردەکردنی غازی ئێران بۆ بەگەڕخستنی وێستگەکانی کارەبا بەردەوامە.

لێدوانی فەرمی: مەهدی ساڵح، بەڕێوەبەری بەرهەمهێنانی کارەبای باشووری عێراق لە نوێترین لێدوانیدا بۆ میدیا عێراقییەکان ڕایگەیاندووە، سەرەڕای ئەوەی بەخشینی کڕینی غازی ئێران بۆ عێراق لە لەلایەن ئەمریکاوە لە 8ـی ئەم مانگەوە واتە زیاتر لە هەفتەیەکە کۆتایی هاتووە، بەڵام هاوردەکردنی غازی سروشتی لە ئێرانەوە بۆ عێراق بەردەوامە و نەوەستاوە".

زانیاریی زیاتر: عێراق بۆ بەگەڕخستنی دوو لە سەر سێی وێستگەکانی کارەبا، پشت بە هاوردەی غازی ئێرانی دەبەستێت و ئەمریکاش بەردەوامە لە گوشارەکانی تاوەکو عێراق لە دابینکردنی وزە سەربەخۆ بێت، بۆیە بەخشینەکانی کڕینی غازی ئێرانی لەسەر عێراق هەڵگرت. 

ئەمەش بزانە: لە دوایین پێشهاتدا وەزیری وزەی تورکیا، سەردانی هەولێر و بەغدای کرد و تەوەری سەرەکی کۆبوونەوەکانیشی لەگەڵ بەرپرسانی عێراق لە بارەی وزە بوو، لە دیارترینیش عێراق هاوردەکردنی کارەبا لە تورکیاوە دوو هێندە بکات، بۆ دابینکردنی غازی سروشتیش ڕوو لە تورکیا بکات.