موقتەدا سەدر سەبارەت بەنەشتەرگەری جوانکاری و یاری ئۆنۆ فەتوا دەدات

 

ئاڤا نیوز

ڕێبەری ڕەوتی نیشتمانیی شیعە لە وەڵامی پرسیاری یەکێک لە شوێنکەوتووانی سەبارەت بە نەشتەرگەری جوانکاری دەڵێت، " کێشەی نییە ئەگەر سنوورداربێت "، بۆ یاری ئۆنۆش مەرج دادەنێت.

وێنە گەورەکە: دوای ئەوەی موقتەدا سەدر، ڕێبەری ڕەوتی نیشتمانیی شیعە لە کاری سیاسی دوورکەوتەوە، ئێستا لە نووسینگەکەی خۆی لەپارێزگای نەجەف بەردەوام وەڵامی پرسیاری شوێنکەوتووان و لایەنگرانی لە "چوارچێوەی شەریعەت و یاسا" دەداتەوە.

بڵاوکراوەی فەرمی: بەگوێرەی بڵاوکراوەیەک کە واژۆی موقتەدا سەدر، ڕێبەری ڕەوتی نیشتمانیی شیعەی لەسەرە، لە وەڵامی پرسیارێک سەبارەت بە نەشتەرگەری جوانکاری دەڵێت: کێشەى نییە ئەگەر ئاکامی حەرامی لێنەکەوێتەوە لەکاتی ئەنجامدانی نەشتەرگەریەکە و دوای ئەنجامەکەی، وەک سەرنجڕاکێشانی خەڵکی و کەسانی بێ ئیرادە و نامەحرەم و هاوشێوەکانی. 

 

لە لایەکی دیکەوە: لە وەڵامی پرسیارێکی دیکە لەبارەى یاریى ئونۆوە سەدر دەڵێت، ئەگەر ئەو یارییە بەمەبەستی قومار و یاریکەرەکان لە کار و ئەرکى ئایینی و شەریعەت دوورنەخاتەوە، هاوکات ببێتە ئامرازێک بۆ کۆبوونەوەى خێزان، ئەوا هیچ کێشەیەکی لەسەر نییە.