مەزڵووم عەبدی: سووریا پێویستی بە ئاگربەستێكی سەرتاسەرییە

ئاڤا نیوز

مەزڵووم عەبدی، فەرماندەی هێزەكانی سووریای دیموكرات سەبارەت بە گیانلەدەستدانی نۆ ئەندامی یەك خێزانی گوندێكی كۆبانێ لەلایەن توركیاوە، پەیامێكی ڕاگەیاند.

چیرۆكی سەرەكی: درەنگانێکی شەوی ڕابردوو فڕۆکەی بێ فڕۆکەوانی تورکیا سنووری گوندێکی لە باشووری کۆبانێ بۆردوومان کرد، لە ئەنجامیشدا نۆ ئەندامی یەک خێزان گیانیان لەدەستدا و دوو ئەندامی دیکەشیان بریندار بوون.

لێدوانی فەرمی: مەزڵووم عەبدی، فەرماندەی هێزەكانی سووریای دیموكرات (هەسەدە) لە تۆڕی كۆمەڵایەتیی ئێكس نووسیویەتی:

٠ پرسە ئاراستەی كەسوكاری قوربانیانی بۆردومانەكەی توركیا بۆ سەر خێزانێكی سنووری كۆبانێ دەكەم و هیوای زوو چاكبوونەوەش بۆ بریندارەكان دەخوازم، بە ئامانجگرتنی جووتیارێك و هاوسەر و منداڵەكانی تاوانێكی دژ بە مرۆڤایەتییە.

٠ پێویستە حكومەتی كاتیی سووریا سەبارەت بە بەئامانجگرتنی خەڵكی سڤیلی وڵاتەكە هەڵوێستی هەبێت و بەرپرسیارێتی هەڵبگرێت.

٠ داوا لە هاوپەیمانیی نێودەوڵەتی و هێزە كاراكان دەكەین بێنە دەنگ بۆ ڕاگرتنی ئەم جۆرە تاوانانە، ئاگربەست لە تەواوی خاكی سووریا بکرێت.

٠ ئێستا سووریا پێویستی بە ئاگربەستێكی سەرتاسەرییە بۆ پاراستنی ئارامی و سەقامگیریی وڵاتەكە.