کرملین: ئامادەكارییەكان بەردەوامن بۆ پەیوەندیی تەلەفۆنی نێوان پوتن و ترەمپ

ئاڤا نیوز

کرێملن ڕایگەیاند کە ئامادەکارییەکان بەردەوامن، بۆ ئەوەی سبەی سێشەممە سەرۆکی ڕووسیا، ڤلادیمیر پوتن و سەرۆکی ئەمریکا، دۆناڵد ترەمپ پەیوەندیی تەلەفۆنی ئەنجام بدەن.

چیرۆکی سەرەکی: کۆشکی سپی و کرێملن  ئامادەکاریی تەواویان کردووە، بۆ ئەنجامدانی پەیوەندی تەلەفۆنی لەنێوان سەرۆکی ڕووسیا، ڤلادیمیر پوتن و سەرۆکی ئەمریکا، دۆناڵد ترەمپ سەبارەت بە مەرجەکانی ڕووسیا بۆ ئاگربەست لەگەڵ ئۆکراینا.

لێدوانی فەرمی: دیمیتری پێسکۆڤ، وتەبێژی کرێملن لە کۆنگرەیەکی ڕۆژنامەوانییدا لە بارەی پرسە گرنگەکانی ئێستا، وەڵامی ڕۆژنامەوانانی دایەوە و ڕایگەیاند: لەبارەی لێدوانەکەی دۆناڵد ترەمپ، سەرۆکی ئەمریکا کە ڕاگەیاندووە، سبەی سێشەممە پەیوەندییەکی تەلەفۆنی لەگەڵ ڤلادیمیر پوتن ئەنجام دەدات، "بەڵێ ئەوە ڕاستە و ئامادەکارییەکان لەوبارەیەوە بەردەوامن".

زانیاریی زیاتر: پێسکۆڤ باسی ئەو پرسانەی نەکرد کە چاوەڕوان دەکرێت لە میانی پەیوەندییە تەلەفۆنییەکەی نێوان پوتن و ترەمپ تاوتوێ بکرێن.

ئەوەی پێویستە بیزانیت: دۆناڵد ترەمپ، سەرۆکی ئەمریکا ڕایگەیاندبوو کە ڕۆژی 18ـی ئەم مانگە پەیوەندییەکی تەلەفۆنی لەگەڵ ڤلادیمیر پوتن، سەرۆکی ڕووسیا ئەنجام دەدات. ئاماژەی بەوەشدا کە لە میانی پەیوەندییە تەلەفۆنییەکەدا، دوایین پێشھاتەکانی تایبەت بە کۆتاییھێنان بە جەنگی نێوان ڕووسیا و ئۆکرانیا لەگەڵ ڤلادیمیر پوتن تاوتوێ دەکات.