لە هەولێر دوو بەنگلادیشی لەسەر فێلێکی سەیر دەستگیر دەکرێن

ئاڤا نیوز

پۆلیسی هەولێر دوو هاووڵاتی بەنگلادیشی دەستگیر کردووە کە هەڵساون بە تۆمارکردنی ڤیدیۆیەک، گوایە یەکێکیان لە هەولێر ڕفێنراوە.

چیرۆکی سەرەکی: یەکێک لە دوو بەنگلادیشییەکە قەرزای ئەوەی دیکەیانە، هەردووکیان ماوەی 10ساڵە لە هەولێر کاردەکەن، ئەوەی پارەکەی بە قەرز داوە، لەم ماوەیە داوای پارەکەی دەکاتەوە، بەنگلادیشییە قەرزارەکە "دەڵێت نیمە، بەڵام وەرە با بەیەکەوە فێڵێک بکەین، بەڵکو سەربگرێت هەم تۆ پارەکە وەردەگرییەوە، هەم منیش پارەم بۆ دەمێنێتەوە".

فێڵەکە چیی بووە؟
بەنگلادیشیە قەرزارەکە دەڵێت: بە پەتێکەوە بمبەستەوە و ڕاستەوخۆ تەلەفۆن بۆ خانەوادەکەم بکە و بە ڤیدیۆ قسەی لەگەڵ بکە، تۆ بە دار لێم بدە و بە هاوژینەکەم بڵێ ڕفێنراوە، ئەگەر 12 هەزار دۆلار نەنێرن، ئازادی ناکەین.

سیناریۆکە جێبەجێ دەکەن
هاوژینی ئەو بەنگلادیشییەی کە قەرزارە، کاتێک ڤیدیۆیەکە دەبینێت، زوو دەزانێت ئەو کارەیان فێلە و باوەڕیان پێ ناکات، لەبەرئەوەی لە ڤیدیۆکەدا دەردەکەوێت ئەوەی پارەی خوراوە، گوایە ڕفێنەرەکەیە و دارێکی بە دەستەوەیە کە لە زەوی دەدات و هاووڵاتییە قەرزارەکەش بە دەستبەستراوی هاوار دەکات.

لەلایەکی دیکەوە: دوای ئەوەی ئەم ڤیدیۆیە بڵاودەبێتەوە، پۆلیسی هەولێر بەدواداچوون دەکات، هەر زوو هەردووکیان دەستگیر دەکەن، ئەوانیش دان بە هەموو شتێکدا دەنێن.