بۆیەکەمجار قەبارەی بودجەی عێراق بۆ ساڵی 2026 ئاشکرا دەکرێت

ئاڤا نیوز

 

ڕاوێژکارێکی سەرۆکوەزیرانی عێراق بۆ کاروباری ئابووری دەڵێت، داهاتەکان لە بودجەی ساڵی 2026 لە بودجەی ئەمساڵ نزیک دەبێت کە 200 تریلیۆن دینارە، دڵنیاییش دەدات کە داهاتەکان لە ساڵی داهاتووشدا، بەشی تەواوی خەرجییەکانی وەک مووچە و پڕۆژەکان دەکات و لەم بوارەدا هیچ کورتهێنانێک دروستنابێت.

 

وێنە گەورەکە: بۆ ساڵانی 2023 و 2024 و 2025 عێراق یاسای بودجەی سێ ساڵەی هەیە، بەگوێرەی یاساکەش بودجەی عێراق لەو ماوەیەدا لە بەرزترین ئاستی ساڵانەیدا دەگاتە 200 تریلیۆن دینار بەڵام ساڵانە زیاتر لە 60 تریلیۆن دیناریش کورتهێنانی دەبێت.

 

لێدوانی فەرمی: مەزهەر محەممەد ساڵح، ڕاوێژکاری سەرۆکوەزیرانی عێراق بۆ کاروباری ئابووری لە لێدوانێکدا ئەوەشی خستووەتەڕوو، یاسای بودجەی ئەمساڵ واتە ساڵی 2025 بەشێوەیەکە کە داهاتەکان بەشی سەرجەم خەرجییەکان تا کۆتایی ساڵ دەکات، لەوانەش مووچە، پڕۆژەکان و پارەی وەبەرهێنان.

 

ئاماژەی بەوەش كرد، هەرچەندە تائێستا وەزارەتی دارایی دەستی بە ئامادەکردنی ڕەشنووسی یاسای بودجەی ساڵی 2026 نەکردووە، بەڵام مەزەندە دەکرێت قەبارەی داهاتەکانی ساڵی داهاتوو لە داهاتەکانی ئەمساڵ نزیک بێت، لەگەڵ ئەوەشدا و بەگوێرەی یاسا لە ئەگەری نەبوونی یاسای بودجەش، لە ساڵی 2026دا دەوڵەت دەتوانێت لە خەرجکردنی مووچە، پڕۆژە خزمەتگوزارییە گرنگەکان  و پڕۆژە ستراتیژییەکان بەردەوام دەبێت.