کەسێک هێرش دەکاتە سەر بنکەیەکی پۆلیسی کەرکووک و بە چەقۆ پۆلیسێک دەکوژێت

ئاڤا نیوز

 

بەرەبەیانی ئەمڕۆ سێشەممە، لە کەرکووک کەسێک هێرشدەکاتە سەربنکەیەکی پۆلیس و بە چەقۆ پۆلیسێک دەکوژێت.

 

چیرۆکی سەرەکی: بەرەبەیانی ئەمڕۆ دوای ئەوەی کەسێک دەچێتە سەر بنکەی پۆلیسی قۆرییە لە پارێزگای کەرکووک، پۆلیسی پاسەوانی بەردەرگا ڕێگە نادات بچێتە ژوورەوە بەهۆیەوە گرژی لە نێوانیان دروست دەبێت. 

 

لێدوانی فەرمی: سەرچاوەیەک لە پۆلیسی کەرکووک، بە ڕۆکان مەحمود پەیامنێری ئاڤای ڕایگەیاندووە: ئەو کەسەکەی هێرشی کردووەتە سەر پۆلیسەکە لە دواوە بە چەقۆ کوشتوویەتی، دواتر بە چەکی پۆلیسەکە بە ئاڕاستەی ناو بنکەکە تەقەی کردووە، بەڵام پۆلیسەکانی دیکەی بنکەکە ڕووبەڕووی بوونەتەوە کەسەکەیان کوشتووە".

 

زانیاریی زیاتر: بەپێی زانیارییەکان کە سەرچاوەکەی پۆلیس بە ئاڤا میدیای داوە، ئەو کەسەی هێرشەکەی کردووە خەڵکی عەمارەیە، چەند ڕۆژێکە لەو گەرەکە دەمێنێتەوە و باری دەروونی تەواو نەبووە و ماددەی هۆشبەریشی بەکارهێناوە و لەژێر کاریگەری ئەو ماددەیەدا هێرشەکەی کردووە.