فایلی خەڵک؛ بڕێک پارە بە هەڵە دەخرێتە سەر هەژماری سەدان کارمەندی ئەمنی

ئاڤا نیوز

بڕێک پارە بە هەڵە دەخرێتە سەر هەژماری سەدان کارمەندی هێزەکانی نەوت و گاز، لیوای یەکی پاراستنی دامەزراوە نەوتییەکانیش ڕاستی بابەتەکە بۆ ئاڤا میدیا ئاشکرا دەکات.

وێنە گەورەکە: سەدان کارمەندی هێزەکانی نەوت و گازی سەر بە وەزارەتی ناوخۆ، لەڕێگەی هەژماری من مووچەیان وەرگرتووە و بڕی 75 هەزار دینار لە مووچەکەیان زیاتر بووە، ئێستاش داوا لەو کارمەندانە دەکرێت پارەکە بگەڕێننەوە.

لێدوانی فەرمی: لیوا سەردار مورتکە، فەرماندەی لیوای یەکی پاراستنی دامەزراوە نەوتییەکان بە ئاڤا میدیای وت:

- مانگانە بڕی 75 هەزار دینار لە هەر کەسێک دەگەڕێنرێتەوە بۆ نەسریەی خۆراک، ئەم مانگە پارەکە نەگەڕێنراوەتەوە و چووەتە سەر هەژماری بانکی ئەو کارمەندانە.

- ئەمە زیادبوونی مووچە نییە و پارەکە بە هەڵە چووەتە سەر هەژماری کارمەندەکان.

- ئەم بڕە پارەیە لەلایەن بەڕێوەبەرایەتیی ژمێریاری گشتی بۆ دابینکردنی ئازوقە لە کارمەندەکان دەگەڕێنرێتەوە.

- گەڕاندنەوەی ئەم بڕە پارەیە سیستەمە و لە هەموو بنکە سەربازییەکان هەیە.