یەک تۆن و 170 کیلۆگرام ماددەی هۆشبەر دەستی بەسەرداگیرا

 

ئاڤا نیوز

بەرێوەبەرایەتی نەهێشتنی ماددە هۆشبەرەکان ڕایگەیاند، لە دوو هەفتەی ڕابردوودا لە چەند شارێکی هەرێمی کوردستان و عێراق زیاتر لە هەزار کیلۆگرام ماددەی هۆشبەر دەستی بەسەردا گیراوە و 16 بازرگانی ماددە هۆشبەرەکانیش دەستگیرکراون کە هەندێکیان خەڵکی وڵاتانی دراوسێن.

چیرۆکی سەرەکی: لە چوارچێوەی هەوڵەکان بۆ ڕووبەڕووبوونەوە و نەهێشتنی ماددە هۆشبەرەکان، لە ژمارەیەک چالاکی جیاوازدا لە دوو هەفتەی ڕابردوو، لە دهۆک و زاخۆ، 82 کیلۆگرام ماددەی هۆشبەر دەستیبەسەردا گیرا، لە بەغدا و مووسڵیش لە دوو چالاکی هاوبەشدا هەزار و 170 کیلۆگرام کەپتاگۆن دەستیبەسەردا گیرا.

ڕاگەیێنراوی فەرمی: بەڕێوەبەرایەتی نەهێشتنی ماددە هۆشبەرەکان لە ڕاگەیێنراوێکدا بڵاوی کردووەتەوە، "لە دهۆک و زاخۆ، توانرا ژمارەیەک بازرگان دەستگیربکرێن کە کاری گواستنەوە و مامەڵەکردنیان بەماددەی هۆشبەرەوە دەکرد و ژمارەیەکیان هاووڵاتی وڵاتانی دراوسێ بوون.

لە ڕاگەیێنراوەکەدا هاتووە، لەم چالاکییانەدا توانراوە

٠ بڕی 22 کیلۆگرام و 940 گرام کریستاڵ، 1 کیلۆگرام و 440 گرام هیرۆین و 50 کیلۆگرام حەبی ترامادۆڵ دەستی بەسەردا گیراوە.

٠ توانراوە تۆڕێکی تری بازرگانی (کریستاڵی شل) هەڵبوەشێنرێتەوە و دەستبگیرێت بەسەر 7 کیۆگرام و 620 گرام کریستاڵی شل کە لەناو دوو دەبەی ڕۆنی ئۆتۆمبێل دانرابوو.

٠ کۆی گشتی ئەو ماددانەی دەستیبەسەردا گیراوە دەکاتە  82 کیلۆگرام ماددەی هۆشبەر و تۆمەتبارەکانیش 16 کەسن.

لە لایەکی دیکەوە: لە ڕاگەیێنراوەکەدا هاتووە، بە هەماهەنگی بەڕێوەبەرایەتی نەهێشتنیی ماددە هۆشبەرەکان، توانرا لە دوو چالاکی جیادا هەزار و 100 کیلۆگرام حەبی کەپتاگۆن لەشاری بەغدا و 70 کیلۆگرام حەبی کەپتاگۆن لەشاری موسڵ دەستی بەسەردا بگیرێت.

زانیاری زیاتر: تیمەکانی بەڕێوەبەرایەتی نەهێشتنی ماددە هۆشبەرەکان لەچالاکیەکی دیکەدا توانیوویانە بڕی 45 کارتۆن دەرمان و حەبی ماوە بەسەرچوو و بێ ستیکەر کە بەشێوەی قاچاغ و نایاسایی هێنرابوونە ناو هەرێمی کوردستان دەستیان بەسەردا بگرن.