قۆناغێکی نوێ لەنێوان پارتی و یەکێتی لەبارەی پێکهێنانی حکومەت دەستپێدەکات

ئاڤا نیوز

قۆناغێکی نوێ لەنێوان پارتی و یەکێتی لەبارەی پێکهێنانی کابینەی 10 دەستپێدەکات، قۆناغی دابەشکردنی پشک و پۆستەکان، بۆ ئەمەش ڕێککەوتن لە نێوانیاندا هەیە، بڕیارە دوای جەژنی ڕەمەزان جارێکی دیکە کۆببنەوە و سەرجەم پۆستەکان یەکلایی بکەنەوە.

وێنە گەورەکە: پێکهێنانی کابینەی 10ی حکومەتی هەرێمی کوردستان لە نێوان پارتی و یەکێتی لە قۆناغی کۆتاییدایە. دوێنێ ئێوارەش شاندی دانوستانکاری هەردوولا ڕەشنووسی بەڕێوەبردنی حکومەت و دابەشکردنی دەسەڵاتەکانیان تەواو کرد.

لێدوانە فەرمییەکان:  ئەوەی لەسەر زاری بەرپرسانی باڵای هەردوو حیزب دەگوترێت پێکهێنانی حکومەتی نوێ زۆری نەماوە. نێچیرڤان بارزانی لە پارتی و قوباد تاڵەبانی لە یەکێتی لە نوێترین لێدوانیاندا دەڵێن: گفتوگۆکان باش چوونەتە پێشەوە و دۆخی ئه‌رێنی ڕەخساوە، پرۆسه‌ی پێكهێنانی حكومه‌ت خێراتر بووه‌ و گه‌شبینن له‌ ماوه‌یه‌كی نزیكدا حكومه‌تی نوێ ڕابگەیێنرێت. 

سەرچاوەیەکی باڵای نێو سەرکردایەتی یەکێتیش بۆ ئاڤا دەڵێت: "پلان وایە لە سەرەتای مانگی چوار دەستەی سەرۆکایەتیی پەرلەمان هەڵبژێردرێت، دواتریش قۆناغەکانی دیکە دەستپێبکەن".

زانیاریی تایبەت: پارتی و یەکێتی سەرجەم پۆستەکانیان لەسەر سێ ستوون پۆلێن کردوون: پۆستە سیادییەکان، وەزارەتە سیادییەکان  و وەزارەت و فەرمانگە خزمەتگورزارییەکان، سەرجەمیشیان لەسەر ئەو سێ بنەمایە دابەش دەکرێن.

بەپێی زانیارییەکانی ئاڤا ئەو پۆستانەی تاوەکو ئێستا یەکلابوونەتەوە ئەمانەن:

٠ سەرۆکی هەرێمی کوردستان بۆ پارتی و جێگرەکەی بۆ یەکێتی.

٠ پۆستی سەرۆکی حکومەتی هەرێمی کوردستان بۆ پارتی و جێگرەکەی بۆ یەکێتی.

٠ سەرۆکی پەرلەمانی کوردستان بۆ یەکێتی و جێگرەکەی بۆ پارتی.

٠ سەرۆککۆماری عێراق بۆ یەکێتی و پەرلەمانتارانی پارتی و یەکێتی پێکەوە دەنگی پێدەدەن.

٠ جێگری سەرۆکی پەرلەمانی عێراق و وەزیرە سیادییەکەی پشکی کورد لە بەغدا بۆ پارتی.

وردەکاریی زیاتر: یەکێتی چاوی لە چەند وەزارەتێکی سیادییە، لە سەرووی هەمووشیان وەزارەتەکانی ناوخۆ و سامانە سروشتییەکان و تەندروستین، ئەمەش تەوەری سەرەکی گفتوگۆی کۆبوونەوەی داهاتووی نێوان ئەم دوو حیزبە دەبێت.