پێشبینی دەکرێت 70 هەزار گەشتیار بەشداری لە نەورۆزی ئاکرێ بکەن

ئاڤا نیوز

 

ئاکرێ وەک پایتەختی نەورۆز ئامادەکاری تەواوی بۆ ڕێوڕەسمی نەورۆزی ئەمساڵ کردووە، ئاهەنگێکی گەورە و جیاواز و سەرنجڕاکێش ڕێک دەخرێت. قایمقامی قەزاکە دەڵێت، پێشبینی دەکەن زیاتر لە 70 هەزار گەشتیار  بەشداری بکەن.

چیرۆکی سەرەکی: سبەی پێنجشەممە 20ـی ئازاری 2025، ئاکرێ بە جیاوازترین و جوانترین شێوە یادی نەورۆز دەکاتەوە و چەندین چالاکی جۆرارجۆر ڕێک دەخرێن. لە ڕێوڕەسمەکەدا سەرۆکوەزیران مەسرور بارزانی و دەیان کونسوڵ و  دیپلۆماتکار و میوانی بیانی بەشداری تێدا دەکەن.

ئەوەی پێویستە بیزانیت: لە ڕێوڕەسمەکەدا هەشت گرووپی خۆبەخش کە زیاتر لە سێ هەزار مەشخەڵی ئاگر هەڵدەگرن و بەسەر قەڵای ئاکرێ و قەڵای کۆنی ئاکرێ و سەرێ تیشی سەردەکەون و لەسەر شاخەکانی ئاکرێ دایدەگیرسێنن، ئەمە جگە لەوەی لەسەر هەرسێ شوێنەکە ئاگری نەورۆز دەکرێتەوە.

گۆشەیەکی دیکە: بۆ یەکەمجار لەسەر ئاستی کوردستان و عێراق جۆرە یارییەکی ئاگرینی جیاواز هێنراونەتە ئاکرێ، بۆ ماوەی 12 خولەک دەتەقێنرێن و ئاکرێ یەک پارچە دەکەنە جۆشوخرۆش.

زانیاریی زیاتر: سێ شاشەی گەورە لە شوێنە جیاوازەکانی ناو شاری ئاکرێ دادەنرێن، بۆ ئەوەی هاونیشتمانیان لە هەموو گۆشەیەکەوە بتوانن جوانییەکانی نەورۆزی ئاکرێ ببینن. هەروەها ژمارەیەک هونەرمەندیش ئامادە دەبن و گۆرانی نیشتمانی دەڵێنەوە.

لێدوانی فەرمی: د. دلاوەر بۆزۆ، قایمقامی ئاکرێ دەڵێت، ئەوان پێشبینی دەکەن زیاتر لە 70 هەزار گەشتیار بۆ سبەینێ سەردانی ئاکرێ بکەن.

زانیاریی پەیامنێر: پەیامنێری ئاڤا ئێوارەی ئەمڕۆ ڕایگەیاند، هەر لە ئێستاوە ژمارەیەکی زۆر لە گەشتیاران هاتوونەتە ئاکرێ و هوتێل و مۆتێلەکان پڕبوون لە گەشتیاران. بەشێک لە گەشتیاران خێمەیان لە شوێنە شاخاوییەکانی ئاکرێ هەڵداوە و ئەمشەو لەو شارە دەمێنەوە.