لە سنووری کفری چوار چەکداری داعش دەکەونە بۆسەی سوپای عێراق

ئاڤا نیوز

لە سنووری قەزای کفری چوار چەکداری داعش دەکەونە بۆسەی سوپای عێراق و پێکدادان لەنێوانیان ڕوودەدات و یەکێک لەو چەکدارانە خۆی دەتەقێنێتەوە.

چیرۆكی سەرەكی: ئێوارەی ڕۆژی چوارشەممە 19-3-2025، مەفرەزەیەکی پاشماوەكانی داعش لەکاتی پەڕینەوەیان لە نێوان سلێمان بەگ و چیای پەلکانە، کەوتوونەتە بۆسەی سوپای عێراق و شەڕ و ڕووبەڕووبوونەوە ڕوویدا.

زانیاریی بەدەستهاتوو: سەرچاوەیەکی ئەمنیی سنوورەكە تایبەت بە ئاڤا ڕایگەیاند، لەکاتی ڕووبەڕووبوونەوە چەكدارییەكەدا، یەکێک لە داعشەكان خۆی تەقاندووەتەوە و چەكدارێكی دیكەش بریندارە و دوو لە چەکدارەکانیش بەرەو چیای پەلکانەی سنوری خورماتوو هەڵهاتوون.

ئەوەی لەبارەیەوە دەوترێت: سەرچاوە ئەمنییەكانی عێراق ئاماژە بەوە دەكەن ئەو داعشەی كوژراوە، گومان دەكرێت خۆی دەقاندبێتەوە یاخود بۆمبی چێندراو پێیدا تەقیبێتەوە.

چی ڕوویدا: هێزێكی زۆری سوپای عێراق لە ناوچەی پێكدادانەكە لە نزیك كارگەی گەچەكە لە كفری، بڵاوەیان پێ كراوە و ڕێگەی سەرەكی نێوان خورماتوو-كفری لەلایەن هێزە ئەمنییەكانەوە كۆنترۆڵ كراوە، مەترسی پێكدادانیش بەردەوامە.