پۆلیسی سلێمانی لەبارەی ڕووداوەکەی سەیدسادق ڕوونکردنەوە دەدات

ئاڤا نیوز

 

بەڕێوەبەرایەتی پۆلیسی سلێمانی لەبارەی ڕووداوەکەی گوندی گرێزەی سەر بە قەزای سەیدسادق ڕوونکردنەوەی دەدات و دەڵێت، بەهۆی کێشەی خێزانییەوە بووە.

 

ڕاگەیێنراوی فەرمی: بەڕێوەبەرایەتی پۆلیسی سلێمانی ڕایگەیاند، کاتژمێر 11:10 خولەکی شەوی چوارشەممە، لە ڕووداوێکی تەقەکردن لە ماڵێکی گوندی گرێزە ئاگادارکراینەوە، تیمەکانی بنکەی پۆلیسی سەیدسادق  هەرزوو گەیشتنە شوێنی ڕووداوەکە.

 

زانیاریی زیاتر: بەگوێرەی لێکۆڵینەوە سەرەتاییەکان دەرکەوتووە، ڕووداوەکە بەهۆی کێشەی خێزانییەوە بووە، گەنجێک بەناوی 'بەشیر سالار' لەدایکبووی 1998 بە چەکی کڵاشینکۆف دەستڕێژی لە ئەندامانی خێزانەکەی کردووە، بەوهۆیەوە باوک، دایک، دوو خوشک، برایەکی و دواتر خۆیشی کوشتووە.

 

زانیاریی بەدەستهاتوو: لەلایەن تیمەکانی بەڵگە و تاوانەوە هێڵکاری بۆ شوێنی ڕووداوەکە کراوە، هەروەها سەرجەم بەڵگەکان کۆکراونەتەوە و دەستبەسەر ئەو چەکەی تاوانەکەی پێکرا، گیراوە.

 

ئەوەی پێویستە بیزانیت: پەڕاوی لێکۆڵینەوە بۆ ڕووداوەکە کراوەتەوە، هەروەها لێکۆڵینەوەکانی پۆلیس بۆ ئاشکراکردنی هۆکاری ڕووداوەکە بەردەوامە.

 

کوژراوەکان پێکهاتوون لە؛

-سالار محەممەد عه‌بدولكه‌ریم، له‌دایكبووی‌ 1970.
-نیهاد قادر ساڵح، له‌دایكبووی‌ 1975.
-سیما سالار محەممەد، له‌دایكبووی‌ 2005.
-سه‌هه‌ند سالار محەممەد، له‌دایكبووی‌ 2015.
-یارا سالار محەممەد، له‌دایكبووی‌ 2018.
-به‌شیر سالار محەممەد، له‌دایكبووی‌ 1998.