سەرۆک بارزانی: جەخت لە پێكەوەژیان و پەیامی ئاشتیخوازانە دەكەینەوە

ئاڤا نیوز

 

بە بۆنەی جەژنی نەورۆز و سەری ساڵی كوردییەوە، سەرۆك بارزانی پەیامێكی بڵاوكردەوە و دەڵێت لە جەژنی نەتەوەیی نەورۆزدا بە شانازییەوە جەخت لە فەرهەنگی پێكەوەژیان و پەیامی ئاشتیخوازانەی گەلی كوردستان دەكەینەوە، نەورۆز بۆ گەلی كوردستان، بەهار و نوێبوونەوە و ڕۆشنایی و ئازادیە.

 

چیرۆكی سەرەكی: 21ـی3ـی هەموو ساڵێك سەری ساڵی كوردییە و یەكەم ڕۆژی جەژنی نەورۆزە كە جەژنێكی نەتەوەیی كوردە. بەم بۆنەیەشەوە سەرۆک بارزانی پەیامێکی بڵاوکردەوە.

 

ڕاگەیێنراوی فەرمی: سەرۆك بارزانی ڕایگەیاند:

- نەورۆز بۆ گەلی كوردستان، بەهار و نوێبوونەوە و ڕۆشنایی و ئازادییە، نەورۆز واتای ژیانێكی تازە و موژدەی سەركەوتنی ڕووناكی بەسەر تاریكی و زوڵمدا دەدات.

 

- بەبۆنەی هاتنەوەی جەژنی نەتەوەیی نەورۆزەوە، پیرۆزبایی لە خانەوادەی سەربەرزی شەهیدان و پێشمەرگە قارەمانەكان و سەرجەم چینوتوێژەكانی خەڵكی كوردستان و هەموو ڕۆڵەكانی گەلی كورد لە پارچەكانی دیکەی كوردستان دەكەم. 

- لێرەدا دەمەوێت بە گەرمی پیرۆزبایی نەورۆز لە ڕەوەندی كوردی و لەو ملیۆنان كوردە بكەم كە بە هەستێكی بەرزەوە دوور لە خاكی نیشتمانتان جەژنی نەورۆز بە بەرزی ڕادەگرن و بەهاكانی نەورۆز بە هەموو جیهاندا بڵاو دەكەنەوە.

- بە شانازییەوە جەخت لە فەرهەنگی پێكەوەژیان و پەیامی ئاشتیخوازانەی گەلی كوردستان دەكەینەوە، هەر لەو سۆنگەیشەوە پشتیووانی پڕۆسەی ئاشتی و چارەسەری لە توركیاین و ئاشتی بە تاكە ڕێگەی ڕاست و دروستی تێپەڕاندنی كێشەكان دەزانین.

- بە هیواین كۆتایی بە ئێش و ئازارەكانی گەلی كورد لە سووریا بێت و كورد بە هەڵوێستێكی هاوبەش و بە ڕێكاری ئاشتیانە لەگەڵ لایەنەكانی دیکەی سووریا بگەنە ئەنجامێك كە لە خزمەتی هەموو لایەكدا بێت.