سعودیه‌ مه‌رجی ته‌مه‌ن به‌سه‌ر حاجیان جێ به‌جێ ده‌كات

ئاڤا نیوز

 

ده‌سته‌ی باڵای حه‌ج و عومڕه‌ی عێراق داوا لە حەج و عومرەی هەرێمی كوردستان دەكات، مەرجی تەمەن لە پرۆسەی حەجی ئەمساڵ لەبەرچاوبگرێت و ڕێگە بە تەنها 7%ـی ئەو كەسانە بدات كە تەمەنیان سەرووی حەفتا ساڵە فەریزەی حەج بكەن.

 

نووسراوی فەرمی: بەپێی نووسراوێكی فەرمیی دەستەی باڵای حەج و عومرەی عێراقی كە وێنەیەكی بۆ ئاڤا میدیا ڕەوانەكراوە و ئاڕاستەی بەڕێوەبەرایەتیی گشتیی حەج و عومرەی هەرێمی كوردستان كراوە، تێیدا ئاماژە بە ڕێنماییەكانی وەزارەتی حەج و عومرەی سعودیە دراوە و داوا دەكات مەرجی تەمەن لە پرۆسەی حەجی ئەمساڵ بەسەر حاجیان جێبەجێ بكات؛ بەجۆرێك ئەو حاجیانەی تەمەنیان سەرووی حەفتا ساڵە، تەنها 7%ـیان ڕێگەیان پێدەدرێت لەكۆی گشتیی حاجیانی عێراق، گەشت بكەن.

 

ئەوەی پێویستە بیزانیت: ده‌سته‌ی باڵای حه‌ج و عومڕه‌ی عێراق داوا له‌ حه‌ج و عومڕه‌ی كوردستان و هه‌موو پارێزگاكانی دیكه‌ی عێراق ده‌كات كه‌ لە ماوەیەكی دیاریكراودا ڕێنماییەكانی وەزارەتی حەج و عومرەی سعودیە جێبەجێ بكەن و تاوەكو 27-3-2025، ڕێكارەكان تەواو بكەن.

 

زانیاریی زیاتر: پشكی دیاریكراو بۆ هەرێمی كوردستان لە ساڵی 2025 بۆ ئەو كەسانەی تەمەنیان سەرووی حەفتا ساڵییە، 358 كەس دیاریكراوە و ژمارەی زیاتر لەوە، دواخستنی ناچارییان بۆ دەكرێت بۆ مەوسمی حەجی ساڵی 2026.

 
زانیاریی بەدەستهاتوو: دوای پێگه‌یشتنی ئه‌و نووسراوه، به‌رێوه‌به‌رایه‌تی گشتی حه‌ج و عومڕه‌ی كوردستان ‌كۆبوونه‌وه‌یه‌كی به‌په‌له‌ی ئه‌نجامدا به‌سه‌رپه‌رشتی به‌رێوه‌به‌ری گشتیی حه‌ج و عومره‌ (شێخ نیاز نه‌قشبه‌ندی) و به‌ ئاماده‌بوونی یاریده‌ده‌ری به‌رێوه‌به‌ری گشتی و سه‌رجه‌م به‌رێوه‌به‌رانیی دیوانی به‌رێوه‌به‌رایه‌تیی گشتیی حه‌ج و عومره‌ و لێپرسراوی سه‌رجه‌م نووسینگه‌كانی حه‌ج و عومره‌ له‌ پارێزگا و ئیداره‌ سه‌ربه‌خۆكان بۆ گه‌یشتن به‌ ڕێگه‌چاره‌یه‌ك لەپێناو جێبەجێكردنی ڕێنماییه‌كانی سعودیه‌ لەلایەك و ڕه‌چاوكردنی به‌رژه‌وه‌ندیی گشتیی هاووڵاتییان لەلایەكی دیكەوە.