بەئامادەبوونی سەرۆک بارزانی جیاوازترین كەرنەڤاڵ لە پایتەختی نەورۆز بەڕێوەدەچێت

ئاڤا نیوز

 

بە ئامادەبوونی سەرۆک مەسعود بارزانی و سەرۆکوەزیران مەسرور بارزانی گەورەترین ئاهەنگی جەژنی نەورۆز لە ئاکرێ بەڕێوەدەچێت، دەیان هەزار کەسیش لە ناوخۆی هەرێمی کوردستان و عێراق و وڵاتانی دراوسێ، هاتوونەتە پایتەختی نەورۆز بۆ بەشداریکردن لە بۆنەکە.

 

چیرۆکی سەرەکی: ساڵانە لەگەڵ هاتنی جەژنی نەورۆز و سەری ساڵی کوردی، کەشوهەوای ئاکرێ جیاواز دەبێت و کەرنەڤاڵی جەژنی نەورۆز لەو شارە، دەنگدانەوەی جیهانی پەیداکردووە،  هەر ئەوەش وایکردووە بە پایتەختی نەورۆز بناسێندرێت.

 

چی ڕوودەدات: کەمێک پێش ئێستا سەرۆکوەزیران مەسرور بارزانی گەیشتە شوێنی ئامادەکراو بۆ ئاهەنگەکە، هاوشان لەگەڵ د. فوئاد حوسێن، وەزیری دەرەوەی عێراق، پێشوازیی لە دەیان کونسوڵ و دیپلۆماتکار و میوانی بیانی کرد کە بەشداری لە بۆنەکە دەکەن.

 

بەلەبەرچاوگرتنی کاتی بەربانگی مانگی ڕەمەزانی پیرۆز، بۆنەکە بەشێوەیەکی فەرمی لەدوای بەربانگ دەستپێدەکات، و تەنها سروود و گۆرانی نەتەوەیی و جەژنی نەورۆز دەوترێت، بێ ئەوەی ئاهەنگی گۆرانی و هەڵپەڕکێ بکرێت.

 

ئەوەی پێشبینی دەکرێت: ئێوارەی ئەمڕۆ، ئاکرێ بە جیاوازترین و جوانترین شێوە یادی نەورۆز دەکاتەوە و چەندین چالاکی جۆرارجۆر ئەنجام دەدرێت، منداڵ و گەنج و پیر و پیاو و ژنی ئەو شارە دەست دەدەنە مەشخەڵی ئاگر و بەرەو سەری گرێ بەڕێدەکەون، گەورەترین ئاگر دەکەنەوە و جەژنەکە پیرۆز دەکەن.

 

لێدوانی فەرمی: دلاوەر بوزو، قایمقامی ئاکرێ بە ئاڤا میدیای ڕاگەیاند: کەرنەڤاڵی نەورۆزی ئەمساڵی ئاکرێ، جیاوازتر دەبێت و مەراسیمی هەڵکردنی ئاگر بە شێوازێکی جوانتر و سەرنجڕاکێشتر بەڕێوەدەچێت.

 

زانیاریی زیاتر: بۆ ئەمساڵ هەشت گرووپی خۆبەخش نزیکەی سێ هەزار مەشخەڵی ئاگریان دروست کردووە و مەشخەڵ بەدەستەکان بەسەر بەرزاییەکانی شارەکە سەردەکەون و بەیەکەوە گەورەترین ئاگر هەڵدەکەن.