سوپای سوودان کۆشکی سەرۆکایەتی کۆمار کۆنترۆڵ دەکات

ئاڤا نیوز

دوای ئەوەی شەڕ و پێکدادان لەنێوان سوپا و هێزەکانی پشتیوانی خێرا لە سوودان سەریهەڵدایەوە، شەڕ و پێکدادان دەگاتە دەوروبەری کۆشکی سەرۆکایەتی لەخەرتوومی پایتەخت و دەنگی پێکدادان لەهەموو گۆشەیەکی ئەو شارە دەبیسترێت.

چیرۆکی سەرەکی: شەڕی چەکداری لە سوودان لە مانگی نیسانی 2023ـەوە لە نێوان سوپا و هێزەکانی پشتیوانی خێرا بەردەوامە، بەپێی ڕاپۆرتە ناوخۆیی و نێودەوڵەتییەکان لە ئەنجامی ئەو شەڕە تاوەکو ئێستا زیاتر لە 20 هەزار کەس گیانیان لەدەستداوە و نزیکەی 14 ملیۆن کەسی دیکەش ئاوارەبوون.

زانیاریی بەدەستهاتوو:  بەگوێرەی میدیا عەرەبییەکان، سوپای سوودان بەتەواوی دەستی بەسەر کۆشکی سەرۆکایەتی ئەو وڵاتەدا گرتووە، کە لە دەسپێکی سەرهەڵدانی شەڕ لە ژێر کۆنترۆڵی هێزەکانی پشتیوانی خێرا دابوو.

زانیاریی زیاتر: بەهۆی چڕی پێکدادانەکانی نێوان هەردوو بەرە تاوەکو ئێستا ژمارەی کوژراو و بریندارەکان نەزانراوە، بەڵام میدیاکانی میسر ئاشکرایان کردووە، بەهۆی تۆپبارانی هێزەکانی پشتیوانی خێرا بۆ سەر ناوچەکانی کەراری و ئۆمبادا لە ئۆمدورمان، هەشت کەس کوژراون و برینداربوون.

ئەمەش بزانە: هێزەکانی پشتیوانی خێرا کە هەزاران ئەندامی هەیە، لە سەردەمی ڕژێمی پێشووی سووداندا بەمەبەستی ڕووبەڕووبونەوە لە یاخیبووانی دارفۆر، پاراستنی سنوورەکان و دەستەبەرکردنی ئاسایشی لەسەر دامەزرا.

قوڵتر: فەرماندەی سوپای سوودان، جەنەراڵ عەبدولفەتاح بوورهان سوورە لەسەر ئەوەی پێکهاتەی ئێستای هێزەکانی پشتیوانی خێرا تێکەڵ بەسوپا بکرێنەوە، لەبەرامبەردا هێزەکانی پشتیوانی خێرا، پێداگرن لەوەی کەدەبێت وڵات لەچنگی عەسکەرتارییەت دەربازبێت و ئیدارەیەکی تەواو شارستانی دامەزرێت.