کۆچبەرەکانی کەنداوی ئینگلیز ڕزگار کران

ئاڤا نیوز

بەلەمێکی کۆچبەران کە لە فەرەنساوە بەڕێ کەوتبوو بەرەو بەریتانیا و بەشی هەرە زۆرییان کوردی باشوور و ڕۆژهەڵاتی کوردستان بوون ماوەی چەند کاتژمێرێک لە کەنداوی ئینگلیز گیریان خوارد و دواتر پۆلیس ڕزگاری کردن.

وێنە گەورەکە: سەرەڕای توندبوونی ڕێکارەکانی دەربازبوون لە فەرەنساوە بۆ بەریتانیا، پەڕینەوەی کۆچبەران بەردەوامی هەیە و لەماوەی ڕابردوودا ژمارەیەکی زۆر خەڵک لەو ڕێگایە گیانیان لە دەستداوە.

لێدوانی فەرمی: ڕەنج پشدەری، ڕۆژنامەنووس و چالاکوان لە بواری کۆچبەران بە ئاڤا میدیای ڕاگەیاند، کاتژمێر 3:00ـی بەرەبەیانی ئەمڕۆ ئەو کۆچبەرانە بە بەلەمێکی چووپ لە ئاوەکانی فەرەنساوە بەڕێ کەوتبوون، بەڵام دوای چوار کاتژمێر ڕۆیشتن بەلەمەکەیان کێشەی بۆ دروست دەبێت و بەشی زۆریان تەندروستییان تێکدەچێت.

زانیاریی زیاتر: ڕەنج پشدەری لەبارەی ناسنامەی سەرنشینانی بەلەمەکە دەڵێت: ژمارەیان 60 کەس بووە، لەو ژمارەیە 40 کەسیان کورد بوون و بەشی زۆریان کوردی ڕۆژهەڵاتی کوردستان و شاری سەردەشت بوون، چوار خێزانیشیان لەگەڵ بووە. کاتژمێر یەکی دوای نیوەڕۆ بەکاتی کوردستان پۆلیسی بەریتانیا گەیشتە کۆچبەرەکان و لە ئاو ڕزگاری کردن.