ئەمریکا: دەمانەوێت متمانەی ئێران بەدەست بهێنین

ئاڤا نیوز 

 

ستیڤ ویتکۆف نێردەی سەرۆکی ئەمریکا بۆ ڕۆژهەڵاتی ناوەڕاست ڕایگەیاند دۆناڵد ترەمپ هەوڵ دەدات لە ڕێگای دروستکردنی متمانە لەگەڵ تاران ڕێگری لە پێکدادانی چەکداری لەگەڵ ئەو وڵاتە بکات.

 

وێنە گەورەکە: بەهۆی بەردەوامیدان بە تەواوکردنی بەرنامە ئەتۆمییەکانی ماوەی چەندین ساڵە ناکۆکی قووڵ لە نێوان ئەمریکا و ئێران هەیە، ئەمریکا بە گەمارۆدانی ئابووری هەوڵیداوە فشار بخاتە سەر ئەو وڵاتە بۆ پەکخستنی بەرنامە ئەتۆمییەکانی بەڵام تاوەکو ئێستا کاریگەریی ئەوتۆی نەبووە و چەندین جاریش هەردوولا هەوڵی لێکتێگەیشتنیان داوە لەسەر ئەو بابەتە بەڵام کاریگەریی نەبووە. 

 

لێدوانی فەرمی: لە چاوپێکەوتنێکی میدیاییدا، ویتکۆف ڕەتیکردەوە نامەکەی ترەمپ بۆ عەلی خامنەیی، ڕێبەری باڵای ئێران هەڕەشەکردن بووبێت لەو وڵاتە و لە بەرپرسەکانی، بەڵکو داوای دانووستان بووە سەبارەت بە بەرنامە ئەتۆمییەکەی ئێران. 

 

- لە ئەگەری پێکدادانی سەربازیدا ئەمریکا باڵادەست دەبێت، هەر بۆیە ئاساییە کە ئێرانییەکان بیر لە چارەسەری دیپلۆماسی بکەنەوە. 

 

لەلایەکی دیکەوە: پێشتر خامەنیی ڕایگەیاندبوو هەڕەشەی ئەمریکییەکانی کاریگەریی لەسەر ئێران نابێت و هەڕەشەی ئەوەشی کردبوو کە ئەگەر ئەمریکا هەڵەیەک بکات ئەوا زەبری کاریگەری بەر دەکەوێت.