سێکتەری بانکی تورکیا ڕووبەڕووی گەورەترین زیان لە 20 ساڵی ڕابردوودا دەبێتەوە

ئاڤا نیوز

خۆپیشاندان و گردبوونەوە جەماوەرییەکان و ئاڵۆزییەکانی چەند ڕۆژی ڕابردووی تورکیا، مەترسی زیانی ئابووری گەورەی لەو وڵاتە دروستکردووە، وەزیری دارایی ئەو وڵاتەش دەڵێت لەرێگای چاکسازییە داراییەکان هەوڵی بەهێزکردنەوەی ئابووری وڵات دەدەین.

 

چیرۆکی سەرەکی: ڕووداوەکانی ئەم دواییەی تورکیا کاریگەریی نەرێنی لەسەر ئابووری ئەو وڵاتە دروست کردووە و سێکتەری بانکی تورکیای ڕووبەڕووی گەورەترین زیان لەماوەی 20 ساڵی رابردوو کردووەتەوە، مەترسی لەسەر وەبەرهێنانی بیانیش لە تورکیا دروست کردووە، پێنوێنی هەڵسەنگاندنی مەترسیی قەرزەکانیش، کە بەیەکێک لە پێوانە سەرەکییەکانی هەڵسەنگاندنی سەقامگیری ئابووری دادەنرێت بەرزبوویەوە بۆ سەرووی 300 خاڵی بنەرەتی ئەمەش بەرزترین ئاستیەتی لەماوەی یەک ساڵی رابردوو.

 

زانیاریی زیاتر: دوای دەستبەسەرکردنی ئەکرەم ئیمامئۆغلو، سەرۆکی گەورە شارەوانی ئیستەنبووڵ لە رۆژی چوارشەممەی رابردوو، ئابووری تورکیا رووبەرووی ناسەقامگیری و نادڵنیاییەکی زۆر بووەتەوە. بەشێوەیەک هەریەک لە سێکتەری بانکی و بازاری پشکەکان و قازانجی کۆمپانیاکان بەشێوەیەکی بەرچاو دابەزیوە، لیرەی تورکیش بەردەوامە لە دابەزین و بەشێوەی بەرچاو بەهاکەی لەدەستداوە. 

 

ئەمەش بزانە: لەگەڵ فراوانبوونی گردبوونەوە جەماوەرییەکان ئابووری ئەو وڵاتە بەرەو ئاراستەیەکی نەرێنی هەنگاو دەنێت، نادڵنیایی و مەترسییەکان بەرزدەبنەوە و داهاتووی ئابووری تورکیا دەخاتە ژێر پرسیار، محەممەد شیمشەک، وەزیری دارایی و خەزێنەی تورکیاش دەڵێت، بەردەوامن لە ئەنجامدانی چاکسازی ئابووری و سیاسەتەکانیان لە خزمەتی بەهێزکردنی ئابووری وڵات بەردەوام دەبێت.