ئیسرائیل بۆردومانی گەورەترین نەخۆشخانەی غەززە دەکات

ئاڤا نیوز

 

شەوی یەکشەممە، سوپای ئیسرائیل بۆردومانی کۆمەڵگەی پزیشکی ناسر کە گەورەترین نەخۆشخانەی باشووری کەرتی غەززەیە کرد.

 

وێنەگەورەکە: درەنگانی شەوی یەکشەممە، 23-3-2025، سوپای ئیسرائیل بۆردومانی کۆمەڵگەی پزیشکی ناسری لە خان یونسی باشووری کەرتی غەززە کرد و بەهۆیەوە پێنج کەس کوژران و چەندین کەسی دیکەش برینداربوون.

ڕاگەیێنراوی فەرمی: وەزارەتی تەندروستی غەززە ڕایگەیاند، بەهۆی بۆردومانی سوپای ئیسرائیل چوار هاووڵاتی سڤیل کوژران و لە ناویاندا ئیسماعیل بەرهوم، ئەندامی مەکتەبی سیاسی بزووتنەوەی حەماس هەیە.

 

لەلایەکی دیکەوە: سوپای ئیسرائیل هێرشەکەی پشتڕاستکردەوە و ئاماژەی بەوەدا لە هێرشێکدا بزووتنەوەی حەماسییان کردووەتە ئامانج.

 

زانیاریی زیاتر: وەزارەتی تەندروستی ڕۆژی یەکشەممە ئاماری کوژراوەکانی هێرشەکانی ئیسرائیل بڵاوکردەوە و ڕایگەیاند، کوژراوەکانی کەرتی غەززە 50 هەزار کەسی تێپەڕاندووە و هەزاران کەسی دیکەش برینداربوون  و بێسەروشوێن بوون.

 

ئەوەی پێشبینی دەکرێت: ڕۆژنامەی وۆڵ ستریت جۆرناڵ ئاماژەی بەوە کردووە، ئیسرائیل بەنیازە گەورەترین ئۆپەراسیۆنی زەمینی لە کەرتی غەززە دەستپێبکات و ئامانجیشیان داگیرکردن و کۆنتڕۆڵکردنی بەشێکی کەرتی غەززەیە بۆ لەناوبردنی تەواوەتی بزووتنەوەی حەماس.