سەرۆکوەزیران بارزانی گەیشتە داڤۆس

ئاڤا دیجیتاڵ 

 

سەرۆکوەزیران بارزانی بۆ بەشداریکردن لە کۆڕبەندی ئابووریی جیهان گەیشتە داڤۆس، لە کۆڕبەندەکەدا چەندین دیدار و گفتوگۆی لەگەڵ سەرکردە و کەسایەتییەکانی جیهان دەبێت.

 

بۆچی گرنگە: مەبەستی بەشداریکردنی سەرۆکوەزیران بارزانی لە کۆڕبەندەکەدا، پتەوکردنی پەیوەندییەکانی هەرێمی کوردستانە لەگەڵ وڵاتانی جیهان، هەروەها ڕای هەرێمی کوردستان لەسەر ئەو پرسانەی لە کۆڕبەندەکەدا باس دەکرێن، دەخاتەڕوو. 

 

ئەوەی ئێستا ڕوودەدات: سەرۆکوەزیران بارزانی ئێوارەی ئەمڕۆ دووشەممە 15-01-2024 بە سەرۆکایەتیی شاندێک بۆ بەشداریکردن لە کۆڕبەندی ئابووریی جیهان لە داڤۆس، گەیشتە سویسرا.

 

زانیاریی زیاتر: کۆڕبەندەکە ئەمساڵ لەژێر ناونیشانی (بونیاتنانەوەی متمانە) دەبەسترێت و چەندین تەوەری تایبەت بە وزە و سیستەمی بانکی و ژیری دەستکرد و چەند پرسێکی سیاسی هەنووکەیی، گفتوگۆیان لەبارەوە دەکرێت.

 

ئەوەی پێویستە بیزانیت: سەرۆکوەزیران بارزانی لەگەڵ ژمارەیەک لە سەرۆک و سەرۆکوەزیران و بەرپرسانی باڵای وڵاتانی ڕۆژهەڵاتی ناوەڕاست و ئەوروپا و جیهان کۆدەبێتەوە، لە دیدارەکانیدا چەندین تەوەر و پرسی ناوخۆیی و هەرێمی و جیهانی تاوتوێ دەکات، لەوانەش پەرەپێدانی پەیوەندیی دوولایەنە بەتایبەتی لە بوارەکانی ئابووری و وەبەرهێناندا، هەروەها بڕیارە لە پانێلێکیش بەشدار بێت کە تایبەتە بە ململانێ و ناکۆکییەکانی ڕۆژهەڵاتی ناوەڕاست.