هەڵەبجە دەخرێتە سەر سیستمی جیهانی نەخشەکانەوە

ئاڤا نیوز

 

کۆمپانیایەکی لوبنانی سەرقاڵی جێبەجێکردنی ماستەر پلانی هەڵەبجەیە، سەرۆکی شارەوانی ئەو پارێزگایەش دەڵێت: بە تەواوبوونی ئەو ماستەر پلانە، ئیدی هەڵەبجە دەخرێتە سەر سیستمی جیهانی نەخشەکان.

 

وێنە گەورەکە: ماستەر پلان داڕشتنەوەی نەخشەی ئەندازەیی شارەکانە، بەو جۆرەی کە لەگەڵ گۆڕانکارییەکانی سەردەم بگونجێت.

 

لێدوانی فەرمی: سەلام بیلال، سەرۆکی شارەوانی هەڵەبجە بە ئاڤا میدیای ڕاگەیاند، ماستەر پلانی هەڵەبجە ملیارێک و  200 ملیۆن دیناری بۆ تەرخانکراوە، لە کۆی پێنج قۆناغ دوو قۆناغی بڕیووە. ئێستا لە قۆناغی کۆکردنەوەی داتاین، هەروەها وێنەکێشانی سنووری نەخشەسازی بۆ دەکرێت، ئەمەش لەڕێگای مانگە دەستکردەکانەوە.

 

بۆچی گرنگە: سەرۆکی شارەوانی هەڵەبجە دەڵێت: بە تەواو بوونی ماستەر پلانەکە، هەڵەبجە لەسەر نەخشەسازی خۆی دەڕوات، بۆ بەشکردنی زەوی بەپێی خەسڵەتی خۆی دەکرێت، ئەو زەوییانەی بۆ یەکەی نیشتەجێبوونن جیا دەکرێنەوە لەگەڵ زەوی بازرگانی یان وەبەرهێنان. خزمەتگوزاری ئاو و ئاوەڕۆ هەمووی بەپێی ستاندارد دەبێت.

 

سەلام بیلال لەبارەی ماستەر پلانی هەڵەبجە ئەم زانیاریانەشی وت:

-    کۆمپانیایەکی لوبنانی بەناوی "خەتیب و عەلەمی" سەرپەرشتی داڕشتن و جێبەجێکردنی ماستەر پلانەکە دەکات، ستافی ئێمەش سەرپەرشتیاری ماستەر پلانەکەن.

-    ئەمساڵ ماستەر پلانەکە تەواو دەبێت، هەنگاوە قورسەکانمان بڕیووە. 

-    تەنیا کێشەمان لە داتا کۆلیکشن، کۆکردنەوەی داتا هەیە و ئەویش چارەسەر دەکرێت.