بافڵ تاڵەبانی کاندیدانی یەکێتیی بۆ پۆستە حکومییەکانی کابینەی نوێ یەکلایی دەکاتەوە

ئاڤا نیوز

یەکێتی نیشتمانی کوردستان لەناوخۆی خۆیدا دەست بە ئامادەکاریی پڕکردنەوەی پشک و پۆستەکانی لە کابینەی نوێی حکومەتی هەرێمی کوردستان و سەرۆکایەتییەکانی دیکەدا دەکات، دوای جەژنیش بەشێک لە پۆستەکان بە سیڤی و بەشێکیشیان بە بڕیاری سیاسی سەرۆکایەتیی حیزبەکە کاندیدیان بۆ دادەنرێت و پشکەکانی پڕدەکرێتەوە.

 

چیرۆکی سەرەکی: پارتی و یەکێتی هەنگاوێک لە ڕێککەوتنی کۆتایی و پێکهێنانی کابینەی نوێی حکومەتی هەرێمی کوردستان دوورن، بڕیارە دوای جەژن جارێکی دیکە کۆببنەوە و گفتوگۆ لەسەر دابەشکردنی پشک و پۆستەکان بکەن، هەنگاوی داهاتووی هەردوو حیزبیش یەکلایی کردنەوەی کاندیدە بۆ ئەو پۆستانەی بەریان دەکەوێت، یەکێتیش لە ئێستاوە دەستی بە خۆ ئامادەکردن کردووە بۆ ئەو قۆناغە نوێیە.

 

زانیاریی تایبەت: سەرچاوەیەک لە سەرکردایەتی یەکێتیی نیشتمانیی کوردستان بە ئاڤا میدیای ڕاگەیاند، "تاوەکو ئێستا داوای سیڤی نەکراوە بۆ پڕکردنەوەی ئەو پۆستانەی کە لە پێکهێنانی کابینەی دەیەمی حکومەتی هەرێمی کوردستان بەریدەکەون، ئەم پرۆسەیە دەکەوێتە دوای کۆبوونەوەی پارتی و یەكێتی کە بڕیارە دوای جەژن بکرێت، چونکە ئەوکات ڕوون دەبێتەوە، کامانەن ئەو پۆستانەی بۆ یەکێتی دەبن."

 

گوتیشی، "سیڤی کاندیدەکان لە ئەنجوومەنی سەرکردایەتی بۆ پۆستەکان تاوتوێ دەکرێن، واژۆی کۆتایی لەلایەن بافڵ تاڵەبانی، سەرۆکی یەکێتیی نیشتمانیی کوردستان دەکرێت و خۆی کاندیدەکان یەکلایی دەکاتەوە."

 

ئەمەش بزانە: بەپێی زانیارییەکانی ئاڤا میدیا، تاوەکو ئێستا ئەوەی یەکلابووەتەوە، یەکێتی سەرۆکی پەرلەمان و جێگری سەرۆکی هەرێمی کوردستان و جێگری سەرۆکوەزیران وەردەگرێت، چاویشی لە وەرگرتنی چەند وەزارەتێکی سیادییە لە سەروو هەمووشیانەوە وەزارەتەکانی ناوخۆ و سامانە سروشتییەکان و تەندروستیی.