بەرەی مقاوەمە لە عێراق هەڕەشە لە ئیسرائیل دەکات

ئاڤا نیوز

گرووپە چەکدارەکانی عێراق "بەرەی مقاوەمە" هەڕەشە لە ئیسرائیل دەکەن و دەڵێن، "دەستپێکردنەوەی شەڕی غەززە کۆتایی بە ئاگربەست لەگەڵ تێلئەڤیڤ دەهێنێت".

 

چیرۆکی سەرەکی: دوای نزیکەی دوو مانگ لە ئاگربەست و ڕاگرتنی شەر، ئیسرائیل هێرشەکانی بۆ سەر کەرتی غەززە دەستپێکردەوە بە بیانووی ئازاد نەکردنی بارمتەکانی کە بڕیاربوو بەپێی ڕێککەوتنی نێوان حەماس و ئیسرائیل ئازاد بکرێن، تێلئەڤێڤ هەڕەشەی بەردەوامبوونی هێرشی ئاسمانی و زەمینی دەکات کە بە هۆیەوە تاوەکو ئێستا هەزاران قوربانی  لێکەوتووەتەوە.

 

ڕاگەیێنراوی فەرمی: بەگوێرەی میدیا عێراقییەکان، گرووپە چەکدارەکانی بەرەی مقاوەمەی ئیسلامی لە عێراق ئاشکرایانکردووە، ئەگەر ئیسرائیل بەردەوامبێت لە هێرشکردنە سەر خەڵکی سڤیلی کەرتی غەززە؛ ئەوا کۆتایی بەو ئاگربەستە تاکلایەنە لەگەڵ ئیسرائیل دەهێنن.

 

زانیاریی زیاتر: گرووپە چەکدارەکانی عێراق ئاماژەیان بەوەشکردووە، لەپێناو پاراستنی ئاسایشی عێراق، لەگەڵ حکومەتی بەغدا گەیشتبوونە ڕێککەوتن بۆ ڕاگرتنی هێرشەکانیان بۆ سەر ئیسرائیل، بەڵام ئەگەر دۆخەکە بەمشێوەیە بڕوات درێژە بە چالاکییەکانیان دەدەن.

 

ئەمەش بزانە: گرووپە چەکدارەکانی بەناوی "بەرەی مقاوەمەی ئیسلامی" لە عێراق وەک هاوپەیمانی مقاوەمەی لوبنانی و یەمەنی ڕۆژانە هێرشی دەکردە سەر ئیسرائیل و لەڕێگەی ڤیدیۆوە لە تۆڕە کۆمەڵایەتییەکان بڵاوی دەکردەوە، بەڵام لەدوای هەڕەشەکانی ئیسرائیل لە بەغدا، "مقامەوەی ئیسلامی عێراق" هێرشەکانی بۆ سەر  ئەو وڵاتە ڕاگرت.