لە عەلوەی کەلار 400 ملیۆن دیناری کاسبکاران بە فێڵ دەبردرێت

ئاڤا نیوز

 

لە عەلوەی کەلار کەسێک پارەی ژمارەیەک دووکاندار دەبات و دیارنامێنێت، دوکاندارێکی عەلوەکەش دەڵێت، "کەس سکاڵای تۆمار نەکردووە".

 

چیرۆکی سەرەکی: کەسێک بەناوی حسام عواد غێدان کە ناسراوە بە 'حسام شارەبانی'، ماوەی چوار ساڵە بۆ کڕین و گواستنەوەی سەوزە و میوە بۆ عەلوەکانی ناوەڕاست و خوارووی عێراق، چووەتە عەلوەی کەلار و لە دوکاندارەکان پێداویستییەکانی بە قەرز کڕیوە، دواتر کە عەلوەی ئەو شارانە پارەیان بۆ ڕەوانە کردووە، حسام شارەبانی ڕادەستی دووکاندارەکانی کردووەتەوە، بەڵام ئەمساڵ جیاوازبووە و پابەندی گەڕانەوەی قەرزەکان لە کاتی خۆیدا نەبووە، ئێستا 400 ملیۆن دینار قەرزی دووکاندارەکانی لایە و موبایلی داخستووە.

 

زانیاریی تایبەت: دووکاندارێکی عەلوەی کەلار بە ئاڤا میدیای وت، چوار ساڵە حسام شارەبانی لەبەرامبەر گواستنەوەی بارەکان بڕی 100 بۆ 150 هەزار دینار کە وەریدەگرێت، دێتە عەلوەی کەلار و پێداویستی بۆ عەلوەکانی شارەکانی ناوەڕاست و خوارووی عێراق دەکڕێت و بۆیان دەگوازێتەوە، ئەگەر لەو عەلوانە پارەی پێنەدەن ئەوا ئەم ئیفلاس دەکات و ناتوانێت پارە بۆ دووکاندارەکان بگەڕێنێتەوە، هەر ئەمەش هۆکاری داخستنی ژمارەی موبایلەکەیەتی، پێشتریش چەندین حاڵەتی لەو جۆرە لە ناو عەلوە ڕوویداوە.

 

زانیاریی بەدەستهاتوو: بەوتەی ئەو دووکاندارەی عەلوەی کەلار، ئەو 400 ملیۆن دینارە هی نزیکەی 20 دووکاندارە، دووکاندار هەیە بە بەهای 70 ملیۆن دینار، 45 ملیۆن دینار، 35 ملیۆن دینار سەوزە و میوەی پێداوە.

 

زانیاریی زیاتر: تاوەکو ئێستا دووکاندارەکان سکاڵایان لەسەر حسام شارەبانی تۆمار نەکردووە؛ دووکاندارەکەی عەلوەی کەلار لەوبارەیەوە دەڵێت، "ناتوانین سکاڵا تۆمار بکەین، دەبێت بە شێوازی عەشایەری چارەسەر بکرێت".