دانیشتنی پەرلەمانی عێراق بۆ دەنگدان لەسەر بەپارێزگابوونی هەڵەبجە دواخرا

ئاڤا نیوز

 

دانیشتنی ئەمشەوی پەرلەمانی عێراق لەسەر بەپارێزگابوونی هەڵەبجە بەهۆی نەبوونی نیسابی یاساییەوە، بۆ سبەی چوارشەممە دواخرا.

 

بۆچی گرنگە: لە مانگی نیسانی ساڵی 2023ەوە پڕۆژەیاسای بەپارێزگابوونی هەڵەبجە لە پەرلەمانی عێراقە و خوێندنەوەی یەکەم و دووەمی بۆ کراوە و تەنیا خوێندنەوەی سێیەم و دەنگدانی کۆتایی ماوە، سەرەڕای فشارەکانی کوردیش بەڵام بەهۆی ناکۆکییەوە پڕۆژەیاساکە تێنەپەڕێنراوە کە بەهۆیەوە هەڵەبجە لەڕووی ئابوورییەوە گەشەی زیاتر بەخۆیەوە دەبینێت، لە بودجەی عێراقیش وەک پارێزگایەک بودجەی تایبەتی خۆی دەبێت.

 

ڕاگەیێنراوی فەرمی: ڕاگەیاندنی پەرلەمانی عێراق بڵاویکردەوە، کۆبوونەوەی ئەمشەوی پەرلەمانی عێراق بۆ سبەی چوارشەممە دواخرا، ئەویش بەهۆی نەبوونی نیسابی یاسایی بۆ دانیشتنەکە.

 

پێدراوە ڕاستییەکان: ڕاگەیاندنی پەرلەمان ئاماژەی بە گۆڕانکاری لە کاتی دانیشتن و کارنامەی کۆبوونەوەکە نەکردووە، بەوپێیەش دانیشتنی سبەی پەرلەمانی عێراقیش کاتژمێر 8:00ی شەو دەکرێت و دەنگدان لەسەر بەپارێزگابوونی هەڵەبجە بڕگەی یەکەمی دانیشتنەکە دەبێت.

 

ئەمەش بزانە: ڕێبوار هادی، سەرۆکی لیژنەی یاسایی لە پەرلەمانی عێراق بە ئاڤا میدیای ڕایگەیاند، فراکسیۆنە کوردستانییەکان بڕیاریانداوە بەشداریی هیچ دانیشتنێکی داهاتووی پەرلەمان ناکەن، ئەگەر پڕۆژەیاسای بە پارێزگابوونی هەڵەبجەی تێدا نەبێت.

 

هۆکارە زانراوەکان: لایەن و فراکسیۆنەکانی شیعە و سوننە چەندینجار تێپەڕاندنی یاسای بەپارێزگابوونی هەڵەبجەیان پەکخستووە، ئەوان داوا دەکەن هەندێک قەزای پارێزگاکانی دیکەی عێراقیش بەیەک پاکێج لەگەڵ هەڵەبجە بکرێنە پارێزگا، بەڵام فراکسیۆنە کوردستانییەکان دەڵێن، هەڵەبجە تایبەتمەندیی خۆی هەیە و ڕەتیدەکەنەوە ئەو پڕۆژەیە بە گۆڕانکاری کارگێڕی دیکەوە ببەسترێتەوە.