بەهۆی کارەساتی سروشتی 21 کەس لە ئیندۆنیزیا گیان لە دەست دەدەن

ئاڤا نیوز

بەهۆی لافاو و داڕمانێکی زەوی لە دوورگەیەکی ئیندۆنیزیا، بەلایەنی کەمەوە 21 کەس گیانیان لە دەست داوە و پێنج کەسیش بێسەروشوێنن.

چیرۆکی سەرەکی: شەستەباران و ڕەهێڵە بووەتە هۆی دروستبوونی لافاو و داڕمانی ناوچەیەک لە ڕۆژئاوای دوورگەی سوومەترە لە وڵاتی ئیندۆنیزیا.

زیانە سەرەکییەکان:  18 کەس گیانیان لە دەست داوە و نزیکەی 46 هەزار کەسیش ئاوارە بوون. لافاو زیانی بە زیاتر لە 20 هەزار خانوو گەیاندووە؛ بەهۆی داڕمانەکە 14 خانوو ڕووخاون، لافاو هەشت پردی بردووە و کارەبای زۆربەی ناوچەکانیش پچڕاوە.

لە لایەکی دیکەوە: لە ناوچەیەکی تری ڕۆژئاوای دوورگەکە ئاستی ئاوی ڕووبارەکان هەڵکشاوە و بووەتە هۆی لافاو و داڕمانی تر، لەوێش لانیکەم سێ کەس گیانیان لە دەست داوە.

لێدوانی فەرمی: بەرپرسی ئاژانسی کەمکردنەوەی کارەساتی سرووشتیی ناوچەکە ڕایگەیاندووە: تەرمی 21 کەس دۆزراوەتەوە، هێشتا پێنج کەس بێسەروشوێنن. کاریگەریی لافاوەکە زۆر گەورەیە و ڕێگرە لە بەردەم پڕۆسەی بەهاناوەچووندا. وا ڕێگاکان پاک دەکەینەوە، ئۆتۆمبێلەکانمان ناتوانن دەربچن.

باکگراوند: ئیندۆنیزیا لە وەرزی بارانباریندا زووزوو تووشی داڕمان دەبێت. کێشەکەش بە هۆی بڕینەوەی دارستانەکان و بارانبارینی درێژخایەنەوە خراپتر بووە.