پڕۆژە ستراتیژییەکەی دەڤەری ڕاپەڕین دوای نەورۆز دەکرێتەوە

ئاڤا نیوز

پڕۆژەی پردی دەربەندی ڕانیە - بنگرد 96%ی کارەکانی تەواو بووە و دوای نەورۆز بەڕووی هاووڵاتیاندا دەکرێتەوە.

وێنە گەورەکە: پردی دەربەندی ڕانیە یەکێک لە پرۆژە ستراتیژییەکانی کابینەی نۆیەمی حکومەتی هەرێمی کوردستانە بۆ دەڤەری ڕاپەڕین و ساڵی  2021 لەلایەن سەرۆکوەزیران مەسرور بارزانی بەردی بناغەی بۆ دانراوە.

لێدوانی فەرمی: ئەندازیار ئومێد حەمەعەلی، بەڕێوەبەری گشتیی ڕێگاوبان و ئاوەدانکردنەوە و نیشتەجێکردنی ڕاپەڕین بە ئاڤا نیوزی گوت: ئێستا 96%ی کارەکانی تەواو بووە و دوای نەورۆز لە مەراسیمێکی گەورەدا دەکرێتەوە.

بۆچی گرنگە: دیمەنێکی جوان بە دەربەند دەبەخشێت کە ناوچەیەکی گەشتیارییە و خەڵکێکی زۆر ڕووی تێدەکات، کارئاسانی زۆر بۆ هاتووچۆ دەکات، لەڕووى بازرگانییەوە جووتیارانى بنگرد دەبەستێتەوە بە ڕانیە بۆ ئەوەى زووتر و باشتر بەرهەمەکانیان بگوازنەوە، دەروازەى سنوورى کێلێ بە پارێزگاى سلێمانی دەبەستێتەوە کە ئەمەش کاریگەرییەکى گەورەى ئابوورى و ئاڵوگۆڕی بازرگانى دەبێت بۆ ناوچەکە.

ئەمەش بزانە: پردەکە 420 مەتر درێژە، 15 مەتر پانە لەگەڵ شوێنی ڕۆیشتنی پیادە، زیاتر لە 30 مەتر بەرزە و نزیکەی 13 ملیار دیناری بۆ تەرخانکراوە.