خانەوادەی بەشدار بازیانی سوپاسی ئاڤا دەکەن

ئاڤا نیوز

 

ڕۆژنامەنووس بەشدار بازیانی دوای 28 ڕۆژ لە دەستگیرکردنی لەلایەن ئاسایشی سلێمانی، پێشنیوەڕۆی ئەمڕۆ بە کەفالەتی یەک ملیۆن دینار ئازادکرا تاوەکو کاتی دادگایی کردنەکەی، خانەوادەکەشی سوپاسی ئاڤا دەکەن کە وەک دەزگایەکی میدیایی پڕ بایەخ و نیشتمانپەروەر، ڕۆڵێکی گرنگیان هەبوو لە بڵاوکردنەوەی زانیاری و داکۆکیکردن لە مافی کوڕەکەیان.

 

چیرۆکی سەرەکی: 28 ڕۆژ لەمەوبەر هێزێکی ئەمنی سلێمانی لە سێ شوێنی جیاواز دەچنە سەر ماڵی سێ ڕۆژنامەنووس (بەشدار بازیانی، دانا ساڵح و نەبەز شێخانی) و هەرسێکیان دەستگیردەکەن، ڕۆژێک دواتر دووانیان بە کەفالەتی یەک ملیۆن دینار ئازادکران، ئەمڕۆش بەشدار بازیانی ئازادکرا.

 

لێدوانی فەرمی: خانەوادەی بەشدار بازیانی سوپاسنامەیەکی تایبەتیان بۆ کەناڵی ئاڤا ناردووە و تێیدا جەخت لەوە دەکەنەوە کە چاودێری و بەدواداچوونی بەردەوامی ئاڤا بۆ دۆخی بەشدار بازیانی، گرنگی و هەستیاریی مافی ڕۆژنامەنووسانی بۆ کۆمەڵگە دەرخست.

 

ئەوەی پێویستە بیزانیت: "کەناڵی ئاڤا وەک دەزگایەکی میدیایی پڕ بایەخ و نیشتمانپەروەر، ڕۆڵێکی گرنگتان هەبوو لە بڵاوکردنەوەی زانیاری و داکۆکیکردن لە مافی بەشدار. بەردەوامی و وردبینی ئێوە لە گواستنەوەی هەواڵدا، هیوا و ئومێدی خێزانەکەمانی بەردەوام زیندوو دەهێشتەوە، دەمانەوێت سوپاسێکی گەرم و تایبەتتان پێشکەش بکەین بۆ هەوڵ و چالاکییە بەردەوامەکانتان لەپێناو ئازادکردنی ئەو ڕۆژنامەنووسە". خانەوادەی بەشدار بازیانی وادەڵێن.

 

لەلایەکی دیکە: بەشدار بازیانی دوای ئازادبوونی لە کۆنگرەیەکی ڕۆژنامەوانیدا گوتی، "دەستمان بۆ هەندێک بابەتی هەستیار برد کە زیانی بە ئاسایشی نیشتمانی گەیاندووە، بە مەبەست نەبووە و نەمانزانیوە، داوای لێبووردن دەکەین."

 

ئەمەش بزانە: بەگوێرەی بەدواداچوونی ئاڤا دوای جەژن بەشدار بازیانی دادگایی دەکرێت لەسەر چەند کەیسێک، بەڵام هێشتا وادەی دانیشتنی دادگە و کەیسەکان ڕووننەکراونەتەوە