فازڵ میرانی: لەبەر بەرژەوەندی گشتی پارتی هەندێک پۆستی خۆی بە لایەنەکانی تر دەدات

ئاڤا نیوز

به‌رپرسی ده‌سته‌ی كارگێڕیی مه‌كته‌بی سیاسیی پارتی دەڵێت، لە حکومەتی داهاتوودا لەپێناو بەرژەوەندی نیشتمانی و زوو پێکهێنانی حکومەتدا، پارتی تەنازول لە هەندێ پۆستی خۆی دەکا و دەیدا بە لایەنەکانی تر.

وێنە گەورەكە: فازڵ میرانی، به‌رپرسی ده‌سته‌ی كارگێڕیی مه‌كته‌بی سیاسیی پارتی دیموكراتی كوردستان، لەمیانی دیدارێكی تەلەفزیۆنی لەگەڵ كەناڵی ئەلشەرقیە نیوز، تیشكی خستەسەر نوێترین پێشهاتەكانی ناوچەكە و عێراق و هەرێمی كوردستان و مێژووی خەباتی سیاسیی كوردستان.

لێدوانی فەرمی: فازڵ میرانی ڕایگەیاند، گفتوگۆكان لەنێوان دوو حیزبە سەرەكییەكەی كوردستان لەپێناو پێكهێنانی حكومەت، بەردەوامە.

- ئەنجامی هەڵبژاردن ئەوەی یەكلاكردووەتەوە كە سەرۆكی حكومەت هی براوەی یەكەمی هەڵبژاردن بێت.

- دەنگەكانی پارتی بەتەنها لەكۆتا هەڵبژاردن هاوتای دەنگی سەرجەم حیزب و لایەنەكانی دیكەیە.

- جار هەیە ڕێككەوتنی ئەرزی واقیع پابەندمان دەكات لایەنێك كەمتر لەبەشی ڕاستەقینەی خۆی پێبدرێت.

- پشكی سەرۆكی هەرێمی كوردستان لەبەرامبەر دانووستانەكانی وەرگرتنی پۆستی سەرۆككۆماری عێراقە و ئەوە ڕێككەوتنێكی تایبەتی نێوان پارتی و یەكێتییە و پێشتر یەكلاكراوەتەوە، بۆ هەر دۆخێكی نوێش قسەی نوێ دێتە كایەوە.

 لەلایەکی دیکەوە: فازل میرانی ئاماژەی بەوەدا، پێویستە بەرپرسانی باڵای بەغدا ئەوە بزانن كە كورد تەنها لەپێناو مووچە و دەستكەوتی ماددی خەباتی نەكردووە، "بەڵكو بۆ ئەوە خەباتمان كردووە لە عێراقدا هاوبەش و یەكسان بین"، بەداخەوە هێشتا جۆرێك بیركردنەوەی شۆڤێنی هەیە كە سیستمی فیدڕاڵی و هاوبەشیی كورد لە پرۆسەی سیاسی عێراقی پێ هەزم ناكرێت.