قایمقامی هەولێر: ئارامییە نموونەییەكەی هەولێر هۆكارێكی سەرەكیی هاتنی گەشتیارانە

ئاڤا نیوز

چاوەڕوان دەكرێت بۆ جەژنی ڕەمەزان ژمارەیەكی زۆر گەشتیار لە دەرەوەی هەرێمی كوردستانەوە گەشتی شاری هەولێر بكەن و قایمقامی قەزای ناوەندیی هەولێریش دەڵێت، ئارامییە نموونەییەكەی هەولێر هۆكارێكی سەرەكیی هاتنی گەشتیارانە.

وێنە گەورەكە: لەگەڵ هاتنی جەژنی ڕەمەزان كە هاوكات لەگەڵ نەورۆز و بەهار، چاوەڕوان دەكرێت تاوەكوو دوای جەژن دەیان هەزار گەشتیار لە دەرەوەی هەرێمی كوردستانەوە گەشتی شاری هەولێر و ناوچە گەشتیارییەكانی بكەن.

لێدوانی فەرمی: نەبەز عەبدولحەمید، قایمقامی قەزای ناوەندی هەولێر بە ئاڤا میدیای ڕاگەیاند: بە هۆی ئەوەی ئەمساڵ مانگی ڕەمەزان و جەژنی نەورۆز هاوكات بوون، كاریگەریی لەسەر كەمبوونەوەی ژمارەی گەشتیار لە هەرێمی كوردستان هەبووە، بەڵام لەگەڵ ئەوەشدا لە شاری هەولێر چەند فێستیڤاڵ و چالاكییەك لە مانگی ڕەمەزان ئەنجام دران كە كاریگەرییان بۆ ڕاكێشانی گەشتیاران هەبووە، هاوكات لەگەڵ هاتنی جەژنی ڕەمەزانیش ژمارەیەكی زۆر گەشتیار ڕوو لە شاری هەولێر دەكەن.

- ئەو ئامارانەی ڕادەگەیێنرێن بریتین لە ئاماری ئەو كەسانەی كە لە بازگەكان و یاخود لە ڕێگەی فڕۆكەوە دێنە نێو سنووری شاری هەولێر و زۆرینەیان بۆ مەبەستی گەشتیارییە.

- چەند هۆكارێك هەن بۆ هاتنی گەشتیار لە دەرەوەی هەرێمی كوردستان، یەكێك لە سەرەكیترین هۆكارەكان، ئەو ئارامییەیە كە لە شاری هەولێر هەیە و لەسەر ئاستی عێراق و ناوچەكە هاوشێوەی نییە و نموونەییە، لە دەروازەكانەوە ڕێككارە ئەمنییەكان دەستپێدەكات و تا ڕۆیشتنەوەی گەشتیار بەردەوام دەبێت.