دەستەی گەشتوگوزار: ڕێژەی گەشتیارانی نێودەوڵەتی بۆ 25% زیادی كردووە

ئاڤا نیوز

گوتەبێژی دەستەی گشتی گەشتوگوزاری هەرێمی كوردستان ئاماری ژمارەی گەشتیارانی هەرێمی كوردستان ئاشكرا دەكات و دەڵێ بەپێی داتاكان ژمارەی گەشتیارانی نێودەوڵەتی زیادی كردووە.

لێدوانی فەرمی: ئیبراهیم عەبدولمەجید، گوتەبێژی دەستەی گەشتوگوزار بە ئاڤا میدیای ڕاگەیاند: بەپێی ئەو داتا و ئامارانەی لەبەردەستمانە، لەم چەند ساڵەی كۆتایی بەتایبەت لە سەردەمی كابینەی نۆ، هاتنی گەشتیارانی بیانی بۆ هەرێمی كوردستان بەشێوەیەكی بەرچاو زیادی كردووە، وڵاتانی دراوسێ بە پلەی یەكەم و كەنداو بە پلەی دووەم و وڵاتانی ئەورووپا و ئەوانی دیكە بە سێیەم دێن لەڕووی ژمارەوە، ڕێژەكە لە 15%ەوە بەرز بووەتەوە بۆ 25%.

- گەشتوگوزار لە سەردەمی كابینەی نۆیەمدا بە سەردەمی زێڕین هەژمار دەكرێت، چونكە ئەو كەرتە هەنگاوی زۆر گەورە چووەتە پێشەوە.

- لە ساڵی 2007 ژمارەی ساڵانەی گەشتیاران تەنیا 300 هەزار بووە، دواتر وردە وردە ژمارەكە بەرز بووەوە، جگە لە ساڵانی شەڕی داعش و ڤایرۆسی كۆرۆنا، ژمارەكە بەردەوامە لە بەرزبوونەوە.

- لە ساڵی 2021 ژمارەی گەشتیاران گەیشتووەتە چوار ملیۆن کەس و لە ساڵی 2022، بەرز بووەوە بۆ شەش ملیۆن و 180 هەزارکەس، لە ساڵی 2023 گەیشتووەتە لوتكە كە زیاتر حەفت ملیۆن گەشتیار بووە.

لەلایەكی دیكەوە: سەبارەت بە داتا و ئامارەكانی گەشتیاران بۆ ساڵی 2024، گوتەبێژی دەستەی گەشتوگوزار ئاماژەی بە ئەوە دا، لە مانگی شەشی ساڵی 2024ەوە ڕاگەیاندنی ئاماریان ڕاگرتووە و نایانەوێ تەنیا ژمارە بڵاو بكەنەوە، بەڵكو مەبەستیانە  شوێن و ڕەگەز و هەموو شتێك سەبارەت بە ئەو گەشتیارانەی ڕوویان لە هەرێمی كوردستان كردووە ئاشكرا بكەن، ئەمەش بۆ ئەوەی پلانەكانیان بۆ داهاتوو وردتر و كاریگەرتر بن.