ڕۆیتەرز: دانوستاندنی هەناردەکردنەوەی نەوتی هەرێمی کوردستان بەربەستی بۆ دروست بووە

ئاڤا نیوز

ئاژانسی ڕۆیتەرز ئاشکرای کردووە، دانوستاندنەکانی هەناردەکردنەوەی نەوتی هەرێمی کوردستان لەڕێگەی بەندەری جەیهانی تورکیاوە تووشی بەربەست بووە، کۆمپانیاکانی بەرهەمهێنانی نەوت داوای گەرەنتی پارەدان لە بە‌‌غدا دەکەن.

وێنە گەورەکە: سەرەڕای پەسندکردنی بودجە و دیاریکردنی 16 دۆلار بە کۆمپانیاکان بۆ تێچووی هەر بەرمیلێک نەوت، بەلام تا ئێستا هیچ وادەیەک بە هەناردەکردنەوەی نەوتی کوردستان دیاری نەکراوە، لەگەڵ ئەوەی تا ئێستا چەندین کۆبوونەوەی سێ لایەنی (هەولێر و بەغدا و کۆمپانیاکان) کراون و تورکیاش ئامادەیی خۆی دەربڕیوە.

لێدوانی فەرمی: دوو سەرچاوەی ئاگادار  بە ئاژانسی "ڕۆیتەرز"ـیان ڕاگەیاندووە، گفتوگۆکانی دەستپێکردنەوەی هەناردەکردنی نەوتی هەرێـمی کوردستان لە ڕێگەی بۆریی عێراق - تورکیا، گیروگرفتی بۆ دروست بووە، ئەوەش بەهۆی نەبوونی بەرچاوڕوونی دەربارەی شێوازی پارەدان و گرێبەستەکان.

زانیاریی زیاتر: کۆمەڵەی پێشەسازیی نەوتی کوردستان "ئەپیکۆر" گرووپێکە لە هەشت کۆمپانیای نەوتی پێکدێت لە هەرێمی کوردستان کاردەکەن، لە ڕاگەیێنراوێکدا ڕایگەیاندووە، هەناردەکردنی نەوتی هەرێـمی کوردستان دەستپێناکاتەوە تاوەکو بەغدا بەڵێنێکی پتەو نەدات بە ڕێزگرتن لە گرێبەستەکانی پێشوو و گەرەنتی بدات بەوەی پارەی ڕابردوو و داهاتوو بەو کۆمپانیانە دەدات.

ئەوەی پێویستە بیزانیت: له‌ 25ـی ئاداری 2023، بە بڕیاری دادگای ناوبژیوانیی پاریس هه‌نارده‌كردنی نه‌وتی هه‌رێمی كوردستان له‌ڕێگه‌ی به‌نده‌ری جه‌یهانی توركیا ڕاگیرا، کە عێراق لە دژی تورکیا تۆماری کردبوو.

کاریگەری و لێکەوتەکان: بەگوێرەی "ئەپیکۆر" ڕاگرتنی هەناردەکردنی نەوتی هەرێمی کوردستان مانگانە زیانەکەی بە یەک ملیار دۆلار دەخەمڵێنرێت، واتە تاوەکو ئێستا زیانی 24 ملیار دۆلاری بە ئابووری عێراق گەیاندووە.